فیفا ورلڈ کپ 2022؛ گروپ اے اور بی سے کون اگلے مرحلے میں جائے گا؟
آج بروز منگل گروپ اے اور گروپ بی کے آخری دور کے مقابلے ہونے والے ہیں جبکہ ان دو گروپس سے راؤنڈ آف سکسٹین میں جانے والی ٹیموں کا فیصلہ آج ہی ہوجائے گا۔
سحر نیوز دنیا: قطر کے وقت کے مطابق شام ساڑھے چھے بجے گروپ اے کے مقابلے طے ہیں ۔ ہالینڈ کی ٹیم گذشتہ دو میچوں میں چار پوائنٹس حاصل کرچکی ہے اور قطر سے جیت کی صورت میں یقینا اگلے مرحلے میں جا پہنچے گی لیکن قطر کے لئے اس میچ کی حیثیت ایک دوستانہ میچ سے بڑھ کر نہیں کیونکہ قطر کی ٹیم گذشتہ دو میچ ہار چکی ہے۔
دوسرا میچ خلیفہ اسٹیڈیم میں ایکواڈور اور سینیگال کے مابین ہوگا ۔ ایکواڈور کی ٹیم ڈرا کر کے بھی اگلے مرحلے میں پہنچ سکتی ہے لیکن سینیگال کی ٹیم کو راؤنڈ آف سکسٹین میں پہنچنے کے لئے ہر حال میں میچ جیتنا ہوگا۔
گروپ بی کے میچ پاکستان کے وقت کے مطابق بارہ بجے رات اور ہندوستان کے وقت کے مطابق ساڑھے بارہ بجے رات کو ہوں گے۔ ویلز اور برطانیہ کے مابین میچ احمد بن علی اسٹیڈیم میں طے ہے جبکہ ایرانی چیتے ایک انتہائی حساس میچ میں امریکی کھلاڑیوں کا الثمامہ اسٹیڈیم میں مقابلہ کریں گے۔ اس گروپ میں تمام ٹیموں کا اگلے مرحلے میں جانا ممکن ہے۔
