ایران سمیت دنیا کے کئی ممالک میں نمازعید فطر کے روح پرور اجتماعات
ایران سمیت عراق، عمان، پاکستان، ہندوستان، ملائیشیا اورآسٹریلیا میں نماز عید الفطر کے روح پرور اجتماعات منعقد ہوئے۔
سحر نیوز/ عالم اسلام: اسلامی جمہوریہ ایران، پاکستان، عراق اور ہندوستان سمیت دنیا کے متعدد ملکوں میں آج نماز عید کے روح پرور اجتماعات میں امت مسلمہ کی سربلندی کی دعائیں مانگی گئیں۔
عیدالفطر کے موقع پر نمازعید کے انتہائی پرشکوہ اور روح پرور اجتماعات منعقد ہوئے جن میں لاکھوں کی تعداد میں لوگوں نے شرکت کی اور ایک ماہ کی روزہ داری اور اطاعت کے اختتام پر نماز شکرانہ ادا کی۔
دیگر ملکوں کی طرح ایران میں بھی آج صبح نماز عید الفطر کے عظیم الشان اجتماعات منعقد ہوئے اور پوری فضا توحید و تکبیر کے خوشبو سے معطر رہی۔
اسلامی جمہوریہ ایران کے لاکھوں مومنین نے ایک ماہ روزہ رکھنے کے بعد آج نماز عید الفطر کے روح پرور اجتماعات میں عالم اسلام اور مسلمانوں خاص طور سے قبلہ اول کی آزادی کیلئے دعائیں مانگیں۔
دارالحکومت تہران میں نماز عید الفطر کی نماز رہبر انقلاب اسلامی کی امامت میں مصلائے امام خمینی رح میں ادا کی گئی جس میں دسیوں ہزار افراد نے شرکت کی۔
مشہد مقدس میں بارگاہ علی ابن موسی رضا ، قم المقدسہ میں حضرت معصومہ سلام اللہ علیھا، شیراز میں حضرت احمد موسی شاہ چراغ اور شہر رے میں حضرت شاہ عبدالعظیم حسنی کے روضوں نیز دوسرے شہروں میں اہلبیت علیھم السلام کی دیگر برگزیدہ ہستیوں کے روضوں میں نماز عید کے بڑے بڑے اجتماعات منعقد ہوئے۔
ان اجتماعات میں عالم اسلام کی سربلندی کے لیے خصوصی دعائیں مانگی گئیں۔ خطیبان نماز عید الفطر نے اپنے خطبوں میں توحیدی افکار کے ساتھ ساتھ حالات حاضرہ پر تفصیل سے روشنی ڈالی اور سماج میں اخلاقی قدروں کے فروغ اور سیاسی شعور کی بیداری پر زرو دیا۔
پاکستان میں بھی آج عیدالفطرانتہائی مذہبی جوش وجذبے کے ساتھ منائی جارہی ہے۔ اس موقع پر دارالحکومت اسلام آباد، کراچی، کوئٹہ، پیشاور اور لاہورسمیت پاکستان کے مختلف شہروں میں نماز عیدالفطر کے چھوٹے بڑے اجتماعات منعقد ہوئے اور لوگوں نے رب کریم کی بارگاہ میں سجدہ ریز ہو کر عید بندگی کا آغاز کیا۔
ہندوستان میں بھی بڑی تعداد میں مسلمانوں نے نماز عیدالفطر کے روح پرور اجتماعات میں شریک ہوکر، عید اطاعت و بندگی کا پرشکوہ طریقے سے آغاز کیا اور امت مسلمہ کی فلاح و بہبود کے لیے دعائیں مانگیں۔
ہندوستان میں نماز عید کا سب سے بڑا اجتماع دہلی کی شاہی جامع مسجد میں منعقد ہوا جس میں کئی ہزار مسلمانوں نے شرکت کی ۔ بعد ازاں لوگوں نے گلے ملکر ایک دوسرے کو مبارک باد پیش کی اور مٹھیائیاں تقسیم کیں۔
لکھنو، ممبئی، بنگلور، حیدرآباد اور کولکتہ وغیرہ میں بھی نماز عید کے روح پرور اجتماعات منعقد کیے گئے۔
پاکستان اور ہندوستان کے زیر انتظام کشمیر میں بھی نماز عید الفطر کےبڑے بڑے اجتماعات منعقد ہوئے۔
عراق میں بھی عیدالفطر آج منائی جارہی ہے اور شہریوں میں بڑا جوش وجذبہ دیکھا جارہا ہے۔
بارگاہ حسینی میں منعقد ہونے والے نمازعید کے پروقار اجتماع میں کئی لاکھ نمازیوں نے شرکت کی اور بعد ازاں روضہ حسینی کی زیارت کا شرف حاصل کیا۔
نجف اشرف میں مولائے متقیان حضرت علی علیہ السلام کے روضہ اطہر میں نماز عیدالفطر کا عظیم الشان اجتماع منعقد ہوا اور ہزاروں نمازیوں نے ایک ماہ کی عبادت و بندگی کی توفیق ملنے پر شکر کے سجدے کیے۔
