SAHAR

روس کی وزارت دفاع نے اعلان کیا ہے کہ روس نے بحیرہ اسود میں روسی بحریہ کے ٹھکانے پر یوکرین کا حملہ ناکام بنا دیا ہے۔

سحر نیوز/ دنیا: روس کی وزارت دفاع کے اعلان کے مطابق یوکرینی فوج نے دو ریموٹ کنٹرول کشتیوں سے نووروسیسک میں روس کی بحریہ کے ایک ٹھکانے کو نشانہ بنانے کی کوشش کی تاہم روسی جنگی بحری جہاز نے اس حملے کو ناکام بنا دیا۔

کراسنودارعلاقے کے کمانڈر ونیامین کوندراتیف نے کہا ہے کہ روسی بحریہ کے ٹھکانے پر یوکرینی فوج کے اس ناکام حملے میں کوئی جانی اور مالی نقصان نہیں ہوا ہے۔

بحیرہ اسود میں روسی بحریہ کے ٹھکانوں پر یوکرینی فوج ، جنگ کے آغاز سے ہی حملہ کرنے کی کوشش کرتی رہی ہے تاہم حالیہ ہفتوں کے دوران اس نے اپنے یہ حملے تیز کر دیئے ہیں۔