امریکی رابرٹ پری ووسٹ کیتھولک مسیحیوں کے نئے پوپ منتخب
ویٹیکن سٹی میں کیتھولک مسیحیوں کے نئے روحانی پیشوا کا انتخاب ہو گیا۔
سحر نیوز/ دنیا: مغربی میڈیا کے مطابق رومن کیتھولک چرچ کی تاریخ میں پہلی بار ایک امریکی شہری کو پاپائے روم منتخب کر لیا گیا ہے۔ شکاگو سے تعلق رکھنے والے کارڈینل رابرٹ پریواسٹ کو چرچ کا نیا روحانی پیشوا منتخب کیا گیا ہے، جنہوں نے ”پوپ لیو چودھویں (Leo XIV)“ کے نام سے اپنی ذمہ داریاں سنبھال لی ہیں۔
69 سالہ رابرٹ پری ووسٹ 2023 میں کارڈینل کے عہدے پر فائز ہوئے تھے۔ ویٹیکن سٹی میں نئے پوپ کا انتخاب کم از کم 4 مرتبہ کی ووٹنگ کے بعد ہوا ہے۔
رابرٹ پری ووسٹ پہلے امریکی پوپ ہیں اور وہ پوپ لیو چہار دہم کہلائیں گے۔
ماہرین کے مطابق پوپ لیو چودھویں کا انتخاب ایک طرف پوپ فرانسس کے اصلاحاتی وژن کا تسلسل ہے، جبکہ دوسری جانب یہ فیصلہ دنیا بھر میں کیتھولک برادری کو درپیش نئے چیلنجز سے نمٹنے کے لیے ایک نئی قیادت کا آغاز بھی ہے۔
واضح رہے کہ 21 اپریل کو رومن کیتھولک چرچ کے پوپ فرانسس 88 سال کی عمر میں انتقال کر گئے تھے۔ وہ کچھ مہینوں سے پھیپھڑوں کی بیماری اور نمونیا کے مرض میں مبتلا تھے۔
