چین اور ہندوستان متنازع علاقوں سے پیچھے ہٹنے پر رضامند
ہندوستان اور چین لداخ میں متنازع علاقوں سے اپنی افواج پیچھے ہٹانے پر رضامند ہو گئے ہیں۔
ہندوستانی میڈیا کی رپورٹ کے مطابق ہندوستان اور چین کی افواج کے مابین مشرقی لداخ میں حقیقی کنٹرول لائن کے مسئلہ پر میٹنگ ہوئی۔ کور کمانڈر سطح کی اس میٹنگ میں اس بات پر اتفاق ہوا کہ دونوں ممالک اپنی اپنی فوج کو متنازع علاقوں سے پیچھے ہٹا لیں گے۔
خبررساں ایجنسی نے ہندوستانی فوجی ذرائع کے حوالے سے بتایا ہے کہ دونوں ممالک کے مابین مثبت اور تخلیقی ماحول میں بات چیت ہوئی جس کے بعد دونوں فریق موجودہ صورتحال سے پیچھے ہٹنے پر راضی ہوگئے ہیں۔ اس میٹنگ میں مشرقی لداخ میں ٹکراو والے علاقوں سے افواج کے پیچھے ہٹنے کے طور طریقوں پر بھی بات چیت ہوئی اور دونوں فریق طے شدہ پروگرام کے تحت اپنی فوج کو مذکورہ علاقوں سے پیچھے ہٹائیں گے۔
واضح رہے کہ مشرقی لداخ میں گلوان وادی کے نزدیک ہندوستانی اور چینی فوج کے درمیان گزشتہ پندرہ جون کو تصادم ہوا تھا جس میں ہندوستان کے بیس فوجی مارے گئے تھے۔ ہندوستانی ذرائع کا کہنا ہے کہ اس جھڑپ میں چین کے بھی کچھ فوجی مارے گئے تھے تاہم اُس نے ان کی تعداد بتانے سے گریز کیا اور چین نے اسے مسترد کیا ہے۔
