چنئی سپر کنگ کے ہاتھوں حیدرآباد سن رائزرز کو شکست
انڈین پریمیئر لیگ آئی پی ایل میں اتوار کی رات چنئی سپر کنگ نے حیدرآباد سن رائزرز کو شکست دے دی ۔
اتوار کی رات پونے میں کھیلے گئے آّئی پی ایل کے ایک میچ میں چنئی سپر کنگ نے حیدرآباد سن رائزرز کو سنسنی خیز شکست سے دوچار کیا۔
پہلے بلے بازی کرتے ہوئے سن رائزرز حیدرآباد نے مقررہ بیس اوور میں چھے وکٹ کے نقصان پر ایک سو نواسی رن بنائے اور چنئی سپرکنگ کو جیت کے لئے ایک سو نوے رن کا ہدف دیا ۔ ہدف کے تعاقب کے لئے بلے بازی کرتے ہوئے چنئی سپر کنگ نے اپنے سلامی بلے بازوں کی شاندار ایک سو بیاسی رن کی شراکت کی وجہ سے دو وکٹ کےنقصان پر دو سو دو رن بناکر یہ میچ جیت لیا۔
اس میچ کی خاص بات یہ ہے کہ چنئی سپر کنگ کے سلامی بلے باز، رتو راج گائیکواڑ صرف ایک رن سے سنچری سے محروم رہ گئے ۔ گائیکواڑ نے ستاون گیندوں پر چھے چھکوں اور چھے چوکوں کی مدد سے ننانوے رنز بنائے تھے کہ وہ نٹ راجن کی گیند پر بھونیشور کمار کے ہاتھوں کیچ آوٹ ہوگئے۔ وہ سنچری بنانے سے رہ گئے لیکن ان کی ٹیم ان کی شاندار بلے بازی کی بدولت جیت گئی ۔
چنئی سپر کنگ کے دوسرے سلامی بلے بازی ڈیون کون وے، پچاسی رن بناکے ناٹ آؤٹ رہے ۔
اتوار کو اس سے پہلے ممبئی کے وان کھیڑے اسٹیڈیم میں آئی پی ایل کے ایک اور سنسنی خیز میچ میں سپرجائنٹس لکھنؤ نے دہلی کپیٹلس کو چھے رن سے شکست دے کر پوائنٹ ٹیبل پر دوسری پوزیشن حاصل کرلی۔
