پر تشدد تصادم کے بعد اوڈیشہ کے بالاسور میں حکم امتناعی نافذ
ہندوستان کی ریاست اوڈیشہ میں بالاسور ضلع انتظامیہ نے پیر کی آدھی رات سے پورے بالاسور میونسپلٹی علاقے میں غیر معینہ مدت کے لیے کرفیو نافذ کر دیا ہے۔
سحرنیوز/هندوستان: ہندوستان کے سرکاری خبر رسان ایجنسی یو این آئی کے مطابق انتظامیہ نے یہ قدم پیر کو دو کمیونٹیوں کے درمیان بڑے پیمانے پر تصادم کے بعد امن و امان برقرار رکھنے کے لیے اٹھایا ہے۔ ضلعی انتظامیہ نے حساس علاقوں میں انٹرنیٹ سروس بھی معطل کر دی ہے اور شورش زدہ علاقوں میں پولیس کی اضافی نفری تعینات کر دی گئی ہے۔ مقامی ایم پی پرتاپ سارنگی اور مقامی ایم ایل اے مانس دتہ نے کل رات سپرنٹنڈنٹ آف پولیس ساگاریکا ناتھ کے ساتھ میٹنگ کی جس کے بعد شہر میں کرفیو نافذ کرنے کا فیصلہ کیا گیا۔ بڑی تعداد میں پولیس اہلکاروں کی موجودگی کے باوجود شہر کے کچھ دوسرے حصوں میں تشدد بڑھ گیا، خاص طور پر پاترپاڑا گاؤں میں۔
ذرائع نے بتایا کہ ہجوم نے مبینہ طور پر ایک عبادت گاہ اور کچھ دکانوں کو نقصان پہنچایا۔ شرپسندوں نے ایک مکان کو بھی آگ لگا دی تاہم کچھ دیر بعد فائر بریگیڈ کے عملے نے آگ پر قابو پالیا۔ رات کے وقت شہر کے کچھ حساس علاقوں سے پتھراؤ کے چھٹپٹ واقعات بھی رپورٹ ہوئے۔ صورتحال پر قابو پانے کے لیے دیگر اضلاع سے سیکیورٹی فورسز کو طلب کیا گیا ہے۔ ضلعی انتظامیہ نے تمام دکانیں، کاروباری ادارے، دیگر ادارے اور تعلیمی ادارے بند رکھنے کا حکم دے دیا۔ ہنگامی خدمات، خاص طور پر طبی خدمات، کھلی رہیں گی۔
