ہندوستان کی لوک سبھا میں قائد حزب اختلاف راہل گاندھی کا کہنا ہے کہ انہوں نے کرناٹک کے وزیر اعلیٰ سدارامیا کو ایک خط لکھ کر وہاں ویمولا ایکٹ نافذ کرنے پر زور دیا ہے۔
سحرنیوز/ہندوستان: ہندوستانی میڈیا کے مطابق راہل گاندھی نے کہا ہے کہ میں نے سدارامیا جی کو خط لکھ کر درخواست کی ہے کہ ویمولا ایکٹ کو نافذ کیا جائے تاکہ ہندوستان کے کسی بھی بچے کو ذات پات نہیں جھیلنا پڑے جس سے بابا صاحب امبیڈکر، روہت ویمولا اور کروڑوں لوگوں کو نقصان اٹھانا پڑا۔
مسٹر گاندھی نے کہاکہ میں نے حال ہی میں پارلیمنٹ میں دلت، آدیواسی اور او بی سی کمیونٹی کے طلباء اور اساتذہ سے ملاقات کی۔ انہوں نے مجھے بتایا کہ کس طرح انہیں کالجوں اور یونیورسٹیوں میں ذات پات کی بنیاد پر امتیازی سلوک کا سامنا کرنا پڑتا ہے۔ بابا صاحب امبیڈکر نے دکھایا تھا کہ تعلیم ہی واحد ذریعہ ہے جس سے محروم بھی بااختیار بن سکتے ہیں، لیکن یہ ذات پات کے نظام کو توڑنے کے بعد بھی لاکھوں طلباء ہمارے تعلیمی نظام میں ذات پات کے امتیازی سلوک کا سامنا کر رہے ہیں۔ انہوں نے کہاکہ اس امتیازی سلوک نے روہت ویمولا، پائل تڈوی اور درشن سولنکی جیسے ہونہار طلباء کی جانیں لے لی ہیں۔ ایسے ہولناک واقعات کو کسی بھی قیمت پر برداشت نہیں کیا جا سکتا۔ اب وقت آگیا ہے کہ اس ناانصافی کو مکمل طور پر روکا جائے۔
