ہندوستان نے نیٹو سربراہ کے مودی-پیوٹن دعوے کو مسترد کر دیا
ہندوستانی وزارت خارجہ نے نیٹو چیف کے بیان کو مسترد کرتے ہوئے کہا کہ وزیر اعظم مودی اور روسی صدر کے درمیان یوکرین پر کوئی گفتگو نہیں ہوئی۔
ہندوستان نے نیٹو کے سیکریٹری جنرل مارک روٹے کے اس بیان کو سختی سے مسترد کر دیا ہے جس میں دعویٰ کیا گیا تھا کہ وزیر اعظم نریندر مودی نے روسی صدر ولادیمیر پیوٹن سے یوکرین کے معاملے پر ماسکو کی حکمت عملی دریافت کی تھی۔
ہندوستانی وزارت خارجہ نے اس دعوے کو مکمل طور پر بے بنیاد اور حقائق کے منافی قرار دیا ہے۔
وزارتِ خارجہ کے ترجمان رندھیر جیسوال نے کہا کہ وزیر اعظم مودی نے صدر پیوٹن سے اس انداز میں کبھی کوئی گفتگو نہیں کی۔ ایسی کوئی بات چیت ہوئی ہی نہیں۔
انہوں نے مزید کہا کہ ہم توقع کرتے ہیں کہ نیٹو جیسے اہم ادارے کی قیادت عوامی بیانات میں زیادہ ذمہ داری کا مظاہرہ کرے۔
جیسوال نے نیٹو سربراہ کے بیان کو غیر محتاط قرار دیتے ہوئے کہا کہ ایسے بیانات جو وزیر اعظم کی مصروفیات کو غلط انداز میں پیش کریں یا ایسی بات چیت کا تاثر دیں جو کبھی ہوئی ہی نہیں، ناقابل قبول ہیں۔
