چوالیسواں جشن انقلاب؛ سرخرو ہوئے ایرانی عوام تو مایوس ہوا دشمن+تصاویر
ایران کے اسلامی انقلاب کی چوالیسویں سالگرہ گزشتہ روز بڑی دھوم سے بنائی گئی۔
سحر نیوز/ایران: ہر سال کی مانند اس بار بھی 22 بہمن مطابق 11 فروری کو ایران کے عوام اپنے اسلامی انقلاب کی چوالیسویں سالگرہ منانے کے لئے سڑکوں پر نکلے اور ایک بار پھر میدان میں حاضر ہو کر جہاں اپنے اسلامی نظام اور اسکی قیادت کے ساتھ اعلان وفاداری کیا وہیں پے در پے سازشوں میں مصروف اپنے شیطان صفت دشمنوں کو بھی بری طرح مایوس کیا۔
ایران کے دارالحکومت تہران سے لے کر ایک چھوٹے سے دیہات اور قریے تک ہر جگہ اسلامی انقلاب کا جشن بڑی ہی شان و شوکت سے منایا گیا۔ جشن انقلاب کا آغاز پہلی فروری کو ہوا تھا، وہی روز جب بانی انقلاب اسلامی امام خمینی (رح) اپنی پندرہ سالہ جلا وطنی کے بعد اپنے وطن ایران واپس لوٹے تھے اور اختتام گزشتہ روز گیارہ فروری کو ہوا۔
ملک بھر میں عوامی ریلیاں نکالی گئی اور دسیوں لاکھ کی تعداد میں لوگ اپنے قومی پرچم، قائد انقلاب اسلامی اور شہیدوں کی تصاویر کے علاوہ امریکہ و اسرائیل مردہ باد کے نعروں سے مزین پلے کارڈز اور بینرز کے ہمراہ بڑے پر جوش انداز میں ریلیوں میں شریک ہوئے اور ایک بار پھر اپنی بصیرت و آگاہی کا مظاہرہ کرتے ہوئے دشمن کے تمام منصوبوں پر پانی پھیر دیا۔
یہ ریلیاں اپنی تمام تر عظمت و شکوہ کے باوجود حسب دستور بین الاقومی میڈیا کی ناانصافی کا شکار رہیں اور گزشتہ ایک سال کے دوران جھوٹ، مکر اور فریب کا سہارا لیتے ہوئے بڑے پیمانے پر ایران کے اسلامی نظام کے خلاف انواع و اقسام کے پروپیگنڈے کرنے والے ذرائع ابلاغ کے پاس اسلامی انقلاب کی چوالیسویں سالگرہ کے موقع پر ایرانی عوام کی پر جوش ریلیوں کو دیکھنے اور دکھانے کا یارا نہ رہا۔
قابل ذکر ہے کہ ایران میں جشن انقلاب اسلامی اپنے آپ میں اس جہت سے منفرد سمجھا جاتا ہے کہ یہ جشن ملک کے عوام سڑکوں پر نکل کر مناتے ہیں اور دیگر بہت سے ممالک کے برخلاف کہ جہاں جشنِ آزادی یا کسی دوسرے قومی جشن میں بنیادی کردار حکومتوں کا ہوتا ہے، ایران میں جشنِ انقلاب و آزادی میں بنیادی کردار خود عوام ادا کرتے ہیں بڑے پو جوش انداز میں سڑکوں پر نکل کر اپنے ملک، نظام اور قیادت کے ساتھ اعلان وفاداری کرتے ہیں۔
