ایران اور سعودی عرب کے وزرائے خارجہ نے ٹیلی فونی گفتگو میں صیہونی حکومت کے جنگی جرائم کا جائزہ لیا ہے
ایران اور سعودی عرب کے وزرائے خارجہ نے خطے کی تازہ ترین صورتحال، بالخصوص غزہ میں صہیونی حکومت کے جنگی جرائم اور فلسطینیوں کی نسل کشی پر تبادلہ خیال کیا۔
سحرنیوز/ایران: ایران کے وزیر خارجہ عباس عراقچی نے سعودی وزیر خارجہ فیصل بن فرحان کے ساتھ بات چیت میں، غزہ میں نہتے فلسطینی عوام کے خلاف صہیونی حکومت کے جرائم کی مذمت کی اور اسلامی ممالک کی فوری اور اجتماعی کارروائی کی ضرورت پر زور دیا۔ عراقچی نے یمن پر برطانوی اور امریکی فوجی حملے کی مذمت کرتے ہوئے بے گناہ خواتین اور بچوں کی شہادت اور ملک کے انفراسٹرکچر کی تباہی پر یمن کی حمایت میں اسلامی ممالک کی مشترکہ ذمہ داری کا ذکر کیا۔ سعودی وزیر خارجہ نے خطے کے ممالک کے مابین غلط فہمیوں کو بڑھنے سے روکنے کے لئے خطے کے ممالک کے درمیان ہم آہنگی اور بات چیت کی ضرورت پر زور دیا اور صیہونی جارحیت کی مذمت کی۔
