ایران اپنے ایٹمی پروگرام کے تحفظ کے لئے ہر ضروری تدبیر سے کام لے گا؛ عراقچی
اسلامی جمہوریہ ایران کے وزيرخارجہ سید عباس عراقچی نے آئی اے ای اے کے ڈائریکٹر جنرل رافائل گروسی کے ساتھ ٹیلیفونی گفتگو میں، ان کے دورہ تہران کی موافقت کرتے ہوئے کہا ہے کہ ایران اپنے ایٹمی پروگرام کے تحفظ کے لئے ہر ضروری تدبیر سے کام لے گا۔
سحرنیوز/ایران: ایران کے وزیر خارجہ سید عباس عراقچی نے ایٹمی توانائی کی بین الاقوامی ایجنسی آئی اے ای اے کے ڈایریکٹر جنرل، رافائل گروسی کے ساتھ ٹیلیفونی گفتگو میں ایران کے پرامن ایٹمی پروگرام کے حوالے سے تازہ صورتحال اور سفارتی مشاورتوں سے انہیں آگاہ کیا۔
سید عباس عراقچی نے آئی اے ای اے کے ساتھ تعاون پر مبنی ایران کی پالیسی کا ذکر کرتے ہوئے کہا کہ ایٹمی توانائی کی بین الاقوامی ایجنسی کو ایران کی پر امن ایٹمی تنصیبات کے خلاف دھمکیوں کے حوالے سے شفاف موقف اختیار کرنا چاہئے۔
انہوں نے کہا کہ ان دھمکیوں کے جاری رہنے کے پیش نظر ایران اپنے پرامن ایٹمی پروگرام کی حفاظت کے لئے ہر ضروری تدبیر سے کام لے گا۔
اس ٹیلیفونی گفتگو میں آئی اے ای اے کے ڈائریکٹر جنرل نے کہا کہ وہ موجودہ مسائل کے حل کے لئے فضا کو ہموار کرنے کی غرض سے سبھی فریقوں سے گفتگو کریں گے۔ رافائل گروسی نے اسی سلسلے ميں اپنے دورہ ایران کی درخواست کی جس کو وزیر خارجہ سید عباس عراقچی نے منظوری دے دی۔
