دشمن کو کسی بھی جارحیت کی اجازت نہیں دیں گے؛ بریگیڈیئر حیدری
اسلامی جمہوریہ ایران کی بری فوج کے کمانڈر نے ایرانی فوج کو دنیا کی ایک طاقتور ترین فوج قرار دیتے ہوئے کہا ہے کہ ہم دشمن کو کسی بھی قسم کی جارحیت کی اجازت نہیں دیں گے۔
سحرنیوز/ایران: ایران کی بری فوج کے کمانڈر بریگیڈیئر کیومرث حیدری نے کہا کہ آج ہماری تیاری اورآمادگی، اطراف کے ملکوں کی مسلح افواج کے برخلاف، اس سطح پر ہے کہ ہم ملک ميں پائیدار سلامتی قائم کرنے پر قادر ہیں۔ انہوں نے کہا کہ اغیار سے ہماری کوئی وابستگی نہيں ہے۔ بریگیڈیئر حیدری نے کہا کہ بری فوج کی ضرورت کے سبھی اسلحے یا ہماری اسی فوج میں تیار ہوتے ہیں یا وزارت دفاع فراہم کرتی ہے، جو زمینی فوج کی خودکفالت کا ثبوت ہے۔
انہوں نے کہا کہ ہم توانائیوں کی اس پوزیشن میں ہیں کہ جدید تکنیک اور جنگی حکمت عملی خلق کرسکتےہیں جن سے دشمن بے خبر ہے۔ بنابریں ہم دعوے کے ساتھ کہہ سکتے ہیں کہ ہم دنیا کی ایک طاقتور ترین فوج ہیں۔
