ایران اور امریکہ کے بالواسطہ مذاکرات کا تیسرا دور، کیا تکنیکی اور ماہرین کی سطح پر بھی مذاکرات ہوں گے؟
سید عباس عراقچی کی قیادت میں ایرانی وفد امریکہ سے بالواسطہ مذاکرات کے لیے آج عمان پہنچ گیا۔
سحر نیوز/ ایران: اسلامی جمہوریہ ایران کی وزارت خارجہ کے ترجمان اسماعیل بقائی کے مطابق وزیر خارجہ سید عباس عراقچی تیسرے دور کے بالواسطہ مذاکرات کے لیے سفارتی اور ماہرین پر مشتمل وفد کے ہمراہ مسقط پہنچ گئے۔
اسماعیل بقائی نے صحافیوں سے گفتگو میں بتایا کہ ایران اور امریکہ کے درمیان طے پانے والے اتفاق کے تحت عمان کی میزبانی میں ہفتے کے روز تکنیکی اور ماہرین کی سطح پر نشستیں منعقد ہوں گی۔
انہوں نے مزید کہا کہ مذاکرات میں پیشرفت کا انحصار مقابل فریق کے حسن نیت، سنجیدگی اور حقیقت پسندی پر ہے۔
ایران کی وزارت خارجہ کے ترجمان نے زور دیا کہ اسلامی جمہوریہ ایران کا وفد اپنی تمام سرگرمیاں فریق مقابل کے رویے اور ماضی کے تجربات کو مدنظر رکھتے ہوئے انجام دے گا اور ایرانی قوم کے قانونی حقوق اور مفادات کے دفاع میں کوئی کسر نہیں چھوڑے گا۔
یاد رہے کہ اسلامی جمہوریہ ایران اور امریکہ کے مابین دوسرے دور کے بلواسطہ مذاکرات 19 اپریل کو روم میں عمان کے سفارت خانے میں منعقد ہوئے تھے جبکہ مذاکرات کا پہلا دور 12 اپریل کو مسقط میں ہوا تھا۔ مذاکرات کا دوسرا دور بھی پہلے دور کی طرح بالواسطہ طریقے سے سلطنت عمان کے وزیر خارجہ بدر البوسعیدی کے ذریعے مثبت انداز میں ہوا۔
ایران کی جانب سے سید عباس عراقچی اور امریکہ کی جانب سے مشرق وسطی کے لیے امریکی صدر کے خصوصی نمائندے اسٹیو وٹکاف نے مذاکرات میں شرکت کی۔
