SAHAR

رہبر انقلاب اسلامی نے حج کو مکمل طور پر ایک سیاسی عبادت قرار دیا ہے۔

سحرنیوز/ایران: آج ادارۂ حج کے منتظمین اور حجاج کرام نے رہبر انقلاب اسلامی آیت اللہ العظمی سید علی خامنہ ای سے ملاقات کی۔ تہران کے حسینیہ امام خمینی (رح) میں ہونے والی ملاقات میں رہبر انقلاب اسلامی آیت اللہ سید علی خامنہ ای نے فرمایا کہ حج ایک ایسی عبادت ہے، بلکہ شاید واحد ایسی عبادت ہے جس کی ظاہری شکل، ساخت اور ترکیب مکمل طور پر سیاسی ہے۔ انہوں نے فرمایا کہ حج کے موقع پر لاکھوں افراد ہر سال اکٹھے ہوتے ہیں۔ اتنی بڑی تعداد میں حجاج کا اکٹھا ہونا بذات خود ایک سیاسی اجتماع ہے۔ لوگوں کا اس طرح اکٹھا ہونا ایک سیاسی نوعیت کا عمل ہے۔

رہبر انقلاب اسلامی نے مزید کہا کہ حج کی سیاسی حیثیت کو کم کرنے والوں کے دعوؤں کے برعکس حج کی حقیقت اور اس کی ماہیت سراسر سیاسی ہے۔ اس کا انداز، اس کی ساخت  سب سیاسی ہے۔ رہبر معظم نے اپنے خطاب کے آغاز میں شہید رجائی بندرگاہ میں پیش آنے والے افسوسناک واقعے کا ذکر کیا اور جاں بحق اور زخمی ہونے والوں کے اہل خانہ سے دلی ہمدردی کا اظہار کیا اور انہیں تعزیت  پیش کی۔ رہبر انقلاب اسلامی نے اس حادثے کو تلخ اور دردناک قرار دیتے ہوئے متاثرہ خاندانوں کے لیے صبر اور زخمیوں کی جلد صحت یابی کی دعا کی۔

انہوں نے  فرمایا کہ یہ واقعی ایک تلخ اور دل سوز حادثہ تھا جو پوری قوم خاص طور پر متاثرہ خاندانوں کے لیے ایک مصیبت بن گیا۔ رہبر انقلاب نے مختلف واقعات کی طرف اشارہ کرتے ہوئے کہا کہ متعلقہ اداروں کو اس طرح کے چیلنجز کا سامنا ہوتا رہتا ہے لیکن ان میں ہونے والے نقصانات پورے کیے جاسکتے ہیں۔ انہوں نے مزید کہا کہ اگر اس حادثے میں کسی ادارے کو نقصان پہنچا ہے تو ان شاء اللہ ہماری جوان، متحرک اور لائق انتظامیہ جلد اس کی تلافی کرے گی۔

رہبر انقلاب نے شہداء کے خاندانوں کے لیے صبر کی تلقین کرتے ہوئے کہا کہ اللہ تعالی صبر کرنے والوں پر صلوات بھیجتا ہے اور ان کے دلوں کو سکون اور اطمینان عطا فرماتا ہے۔