بارہ روزہ جنگ میں صیہونی حکومت کو منہ توڑ جواب ملا؛ ایران کے اسپیکر
اسلامی جمہوریہ ایران کی پارلیمنٹ مجلس شورائے اسلامی کے اسپیکر ڈاکٹر محمد قالیباف نے کہا ہے کہ ہمارے ملک پر امریکا اور صیہونی حکومت نے بالواسطہ مذاکرات کے دوران حملہ کیا۔
سحرنیوز/ایران: اسلامی جمہوریہ ایران کی پارلیمنٹ مجلس شورائے اسلامی کے اسپیکر نے بدھ 9 جولائی کو تہران میں بیلاروس کے سفیر سے ملاقات میں ایران پر امریکا اور صیہونی حکومت کی جارحیت کے دوران، بیلا روس کی حکومت کے موقف کی قدردانی کی۔ انہوں نے کہا کہ ہماری ایٹمی تنصیبات پر حملے قانون کی بدترین خلاف ورزی تھی جس کا ارتکاب امریکا اور صیہونی حکومت نے کیا۔ ایران کے اسپیکر نے کہا کہ امریکا اور صیہونی حکومت نے ایسی حالت میں ہماری پرامن ایٹمی تنصیبات پر حملہ کیا ہے کہ ہم این پی ٹی کے رکن ہیں اور ہماری ایٹمی تنصیبات آئی اے ای اے کی نگرانی میں کام کررہی تھیں۔انہوں نے کہا کہ ہم امریکا کے ساتھ بالواسطہ مذاکرات کررہے تھے کہ ہم پر حملے شروع کردیئے گئے۔
قالیباف نے کہا کہ ہمارے ملک پر مسلط کردہ 12 روز جنگ کے دوران صیہونی حکومت پر ہمارے جوابی حملے ایسے دنداں شکن تھے کہ اس سے پہلے صیہونی حکومت کی غیر قانونی زندگی میں اس پر اتنے شدید جوابی حملے نہیں کئے گئے تھے جن کے نتیجے میں امریکا اور صیہونی حکومت جنگ بند کرنے پر مجبور ہوگئے۔انہوں نے کہا کہ اگر انھوں نے دوبارہ ہمارے ملک پر حملہ کیا تو ہمارا جواب اس سے بھی زیادہ محکم اور سخت ہوگا۔
