صیہونی حکومت کے جرائم میں جرمنی بھی شریک؛ ایران کی وزارت خارجہ
ایران کے دفترخارجہ کے ترجمان نے، ایران کے خلاف صیہونی حکومت کی فوجی جارحیت اور جنگی جرائم کی جرمن چانسلر کی جانب سے مسلسل حمایت کو ان جرائم میں معاونت قرار دیا ہے۔
سحرنیوز/ایران: اسلامی جمہوریہ ایران کے دفتر خارجہ کے ترجمان اسماعیل بقائی نے اپنے سماجی رابطے کے ایکس پیج پرلکھا ہے کہ جرمن چانسلر نے ایران کے خلاف صیہونی حکومت کی فوجی جارحیت کی مسلسل حمایت کی ہے جس کے نتیجے میں اس حوالے سے جرمن حکومت پر بین الاقوامی جواب دہی عائد ہوگئی ہے۔ انہوں نے اپنی اس پوسٹ میں لکھا ہے کہ جرمن چانسلر، اقوم متحدہ کے منشور کے بنیادی اصولوں اور بین الاقوامی قوانین کو پس پشت ڈالتے ہوئے، صیہونی حکومت کی قانونی شکنی اور وحشیانہ ترین جرائم کی حمایت پر مصر ہیں۔ مسٹر فریڈرک مرز(Friedrich Merz) جو خود قانون کی تعلیم حاصل کرچکے ہیں، اچھی طرح جانتے ہیں کہ ایران کے خلاف فوجی جارحیت، اقوام متحدہ کے منشور کی دفعہ 4 کی شق 2 کی خلاف ورزی اور سنگین جرم ہے۔
اسلامی جمہوریہ ایران کے دفترخارجہ کے ترجمان نے اپنی پوسٹ میں لکھا ہے کہ ظلم کی تائید اس کے ارتکاب میں مشارکت ہے۔ ایران کے خلاف صیہونی حکومت کی فوجی جارحیت اور اس کے جنگی جرائم کی حمایت پر جرمن چانسلر کے اصرارنے جو اس جارحیت اور جرائم میں مشارکت اور معاونت ہے، اس حوالے سے جرمن حکومت کو جواب دہ بنادیا ہے۔
