ایشیائی پارلیمانی ایسو سی ایشن کے اجلاس سے ایران کے نائب اسپیکر کا خطاب، ایشیائی ممالک کے اتحاد و یکجہتی کی تقویت پر زور
جنیوا میں ایشیائی پارلیمانی ایسو سی ایشن کے اجلاس سے خطاب میں ایرانی مندوب نے ایشیائی ملکوں کی اتحاد و یکجہتی کی تقویت پر زور دیا ہے۔
سحرنیوز/ایران: ہمارے نمائندے کی رپورٹ کے مطابق ایشیائی پارلیمانی ایسوسی ایشن اے پی اے کے اجلاس سے خطاب میں اسلامی جمہوریہ ایران کے نائب اسپیکر حمید رضا حاجی بابائی نے کہا کہ ایشیائی ملکوں کی پارلیمانی ایسو سی ایشن، رکن ملکوں کی باہمی یکجہتی سے مشترکہ علاقائی اور عالمی چیلنجوں کے مقابلے میں موثر اور ہم آہنگ فیصلے کرسکتی ہے۔
یہ اجلاس جنیوا میں بین الپارلیمانی یونین، آئی پی یو، کے اجلاس کے موقع پر اتوار کی شام منعقد ہوا۔
ایران کے نائب اسپیکر حمید رضا حاجی بابائی نے ایشیائی پارلیمانی ایسو ایشن کے اجلاس سے خطاب میں کہا کہ سیاسی، اقتصادی، ماحولیاتی تغیرات اور سیکورٹی سے متعلق چیلنجوں نے ملکوں کی قومی سلامتی اور سرحدوں کے تحفظ کے لئے سنجیدہ مسائل کھڑے کردیئے ہیں۔
انھوں نے کہا کہ ان حالات میں ایشیائی ملکوں کے درمیان اتحاد ویک جہتی کی ضرورت پہلے سے زیادہ محسوس کی جارہی ہے۔
حاجی بابائی نے کہا کہ غزہ میں جو کچھ ہوا ہے وہ صرف سیاسی تنازعہ نہیں ہے بلکہ ایک انسانی اور اخلاقی المیہ ہے جس نے بین الاقوامی قوانین کے بنیادی اصولوں کو چیلنج کررکھا ہے۔ ان حالات میں ایشیائی ممالک خاموش تماشائی نہیں رہ سکتے۔
ایرانی نائب اسپیکر نے اپنے خطاب میں کہا کہ ایشیائی پارلیمانی ایسو سی ایشن تین اہم شعبوں میں، مشترکہ پالیسی سازی کی توسیع، ایشیا اور مشرق وسطیٰ میں امن و سلامتی کی تقویت اور پارلیمانی اداروں کی یکجہتی کی تقویت میں اسٹریٹیجک کردار ادا کرسکتی ہے۔
انھوں نے کہا کہ جنگوں اور موسمیاتی تغیرات کے باعث مہاجرت کے بحران کو، جو ایشیا میں انسانی سیکورٹی اور علاقائی استحکام کو خطرے سے دوچار کررہا ہے اور بد نظمی اور یک جانبہ پابندیوں سے ماحولیات اور معیشت کو لاحق خطرات کو، پارلیمانی تعاون کے ذریعے کنٹرول کیا جاسکتا ہے۔
انھوں نے کہا کہ براعظم ایشیا ہم سب کا ماضی بھی ہے اور مستقبل بھی۔ ایک ہمہ گیر اور جامع ایشیائی پارلیمان کی تاسیس مستقبل کے لئے بہترین راہ ہے جو اپنی اور رکن ملکوں کی توانائیوں سے سب سے زیادہ استفادہ کرکے ایشیا میں امن و آشتی، سلامتی، رفاہ اور انسانی حقوق کو یقینی بناسکتی ہے۔