SAHAR

شیخ نعیم قاسم نے شام کو استقامت کا ایک اہم ستون قرار دیا اور کہا کہ حزب اللہ کے مجاہدین چار برسوں سے زیادہ عرصے سے شام میں موجود ہیں اور اب روس نے بھی شام میں تکفیری دہشت گردوں کے مقابلے کے لئے اپنی حمایت شروع کر دی ہے۔ حزب اللہ کے نائب سربراہ کا کہنا تھا کہ ساری دنیا اب اس نتیجے پر پہنچ چکی ہےکہ امریکہ اور اس کے اتحادی جھوٹے ہیں، وہ خطے کو تباہ و برباد کرنے کے لئے داعش، جبھۃ النصرہ اور تکفیریوں کو شام میں باقی رکھنا چاہتے ہیں اور وہ داعش کے مقابلے میں سنجیدہ نہیں ہیں۔

شیخ نعیم قاسم کا کہنا تھا کہ امریکہ کی قیادت میں تشکیل پانے والے داعش مخالف اتحاد نے اب تک کوئی کامیابی حاصل نہیں کی ہے۔ شیخ نعیم قاسم کا مزید کہنا تھا کہ استقامت اور اس کے حامی یعنی ایران، روس، حزب اللہ ، شام اور تمام مجاہدین تکفیری دہشت گردی کے مقابلے میں سنجیدہ ہیں۔ حزب اللہ کے نائب سربراہ کا کہنا تھا کہ شام کے بارے میں امریکہ، برطانیہ اور فرانس سمیت دنیا والوں کا موقف بدل چکا ہے اور یہ ممالک اس بات کو اچھی طرح سمجھتے ہیں کہ شام کا کوئی بھی سیاسی حل بشار اسد کے بغیر ممکن نہیں ہے۔