SAHAR

داعش کے خلاف عراقی افواج کے زمینی اور فضائی آپریشن میں دہشت گردوں کو کافی جانی اور مالی نقصان پہنچا ہے اور فوج الانبار کے شہر الرمادی میں داعش کا محاصرہ کر لیا ہے

ارنا کے مطابق عراقی فوج کے بغداد ڈیویژن کے ترجمان، یحیی رسول نے بتایا کہ شہر الرمادی سے متصل بہت سے علاقے داعش کے قبضے سے آزاد کر الئے گئے ہیں۔ انھوں نے اسی کے ساتھ بتایا کہ الرمادی میں داعش کے اراکین، فوج اور عوامی رضاکار فورس کے جوانوں کے مکمل محاصرے میں آگئے ہیں۔
بغداد ڈیویژن کے ترجمان نے بتایا کہ الرمادی میں عراقی افواج کے محاصرے میں آنے والے تکفیری دہشت گردوں کی تعداد کم سے کم تین سو ہے۔
یحیی رسول نے بتایا کہ الرمادی سیکٹر پر عراقی افواج کو پوری طرح بالادستی حاصل ہے۔

انھوں نے بتایا کہ اگر چہ شہر الرمادی پر داعش کا قبضہ ہے لیکن فوج، عوامی رضاکار فورس اور قبائلی لشکر کے جوان، شہر کے مرکز کی جانب پیش قدمی کر رہے ہیں۔
انھوں نے بتایا کہ راستے میں ہر طرف بم اور بارودی سرنگیں بچھی ہوئی ہیں اس وجہ سے شہر الرمادی کے مرکز کی جانب عراقی افواج کی پیش قدمی کی رفتار سست ہے۔ انھوں نے بتایا کہ بعض علاقوں میں ہر سو مربع میٹر کے رقبے میں درجنوں بم اور بارودی سرنگیں موجود ہیں۔
اسی سلسلے میں عراق کی عوامی رضاکار فورس کے ترجمان کریم النوری نے بھی بتایا ہے کہ الانبار میں داعش کے خلاف ہماری جنگ جاری ہے۔

انھوں نے بتایا کہ عوامی رضاکار دستے عراقی فوج کے ساتھ مل کے داعش سے آخری جنگ اور عراق میں ان کا کام تمام کرنے کے لئے پوری طرح تیار ہیں۔
دوسری جانب عراقی فوج کے جیٹ طیاروں نے صوبہ الانبار میں دہشت گردوں کے ٹھکانوں پر بمباری کی ہے جس کے نتیجے میں میدان الاس کے قریب واقع داعش کے متعدد خفیہ ٹھکانوں اور اسلحے سے لدے ٹرکوں کو تباہ کردیا گیا۔

عراقی فضائیہ کے ہیلی کاپٹروں نے اسی علاقے میں واقع مکحول کی پہاڑیوں میں بنائے گئے داعش کے متعدد مورچوں اور خفیہ ٹھکانوں کو تہس نہس کر دیا ہے۔
عراقی فضائیہ نے ایک اور کاروائی کے دوران شولگات، خالدیہ، تلعفر، فلوجہ اور بغدادیہ میں بھی دہشت گردوں کے ٹھکانوں پر حملے کئے ہیں۔ اں حملوں میں درجنوں دہشت گرد ہلاک ہوگئے ہیں۔

صوبہ الانبار میں بھی عراقی فوج نے پیشقدمی کا سلسلہ جاری رکھتے ہوئے البوفراج نامی علاقے میں دہشت گردوں کے تین ٹھکانوں کو مہندم اور متعدد دہشت گردوں کو موت کے گھاٹ اتار دیا ہے۔
تازہ ترین خبروں میں بتایا گیا ہے کہ عراقی فوج اور عوام رضاکاروں کے دستے صوبہ الانبار کے صدر مقام رمادی کے نواحی علاقوں کو آزاد کرانے کے بعد شمال اور مغرب کی جانب سے دو سیکٹروں پر داعش کے خلاف پیشقدمی کر رہے ہیں ۔