SAHAR

عراقی افواج نے فلوجہ کو آزاد کرانے کی اپنی کارروائیاں جاری رکھتے ہوئے اس شہر کے اطراف کے دو مزید علاقوں کو دہشت گردوں کے قبضے سے آزاد کرا لیا ہے

الفرات نیوز ایجنسی نے خبر دی ہے کہ عراقی افواج نے داعش کے خلاف اپنی پیشقدمی کا سلسلہ جاری رکھتے ہوئے فلوجہ شہر کے مغرب میں واقع دو علاقوں الصبیحات اور الفلاحات کو داعش کے قبضے سے آزاد کرا لیا ہے یوں تیس مہینے بعد عراقی افواج فلوجہ شہر کے مرکز کے بالکل قریب پہنچ گئی ہیں- بتایا جاتا ہے کہ فلوجہ شہر کے مرکز سے عراقی افواج کا فاصلہ صرف چند سو میٹر رہ گیا ہے-

خبروں میں بتایا جا رہا ہے کہ فلوجہ شہر کے اندرعراقی افواج اور دہشت گرد گروہ داعش کے عناصر کے درمیان گھمسان کی جنگ جاری ہے- اس درمیان عراقی وزیردفاع خالد العبیدی فوجی کارروائیوں کا قریب سے جائزہ لینے اور فلوجہ کے مغرب میں فوجی چھاؤنیوں کا معائنہ کرنے کے لئے اس علاقے کے دورے پر ہیں-

فلوجہ کو آزاد کرانے کی کارروائیاں گذشتہ تیئیس مئی کو شروع ہوئی ہیں جن میں عراقی فوج، علاقے کے اہل سنت قبائلی لشکر اورعوامی رضاکار فورس شامل ہے- اس عرصے میں فلوجہ کے قریب واقع اسٹریٹیجک اہمیت کے حامل دو شہروں الصقلاویہ اورالکرمہ کو داعش کے قبضے سے آزاد کرا لیا گیا ہے-

عراقی ذرائع کا کہنا ہے کہ فلوجہ کے اندر دوہزار دہشت گرد موجود ہیں جو شہرمیں موجود عام لوگوں کوعراقی افواج کے حملوں کے مقابلے میں انسانی ڈھال کے طور پر استعمال کر رہے ہیں-

داعش نے فلوجہ پر جون دوہزار چودہ میں قبضہ کیا تھا