سعودی صحافی کے قتل کی عالمی تحقیقات کرانے کا فیصلہ
سعودی عرب کے صحافی کے قتل سے متعلق چونکا دینے والی رپورٹ کے سامنے آنے اورسعودی عرب کے تعاون نہ کرنے کی وجہ سے ترکی نےاب اس کیس کو عالمی سطح پراٹھانے کا فیصلہ کیا ہے۔
استنبول میں میڈیا سے بات کرتے ہوئے ترکی کے وزیر خارجہ چاوش اوغلو کا کہنا ہےکہ سعودی صحافی جمال خاشقجی کے قتل کی عالمی تحقیقات کرانے پر غور کیا جا رہا ہے، جس کا باقاعدہ اعلان آئندہ دنوں میں کیا جائے گا۔
وزیر خارجہ کا کہنا تھا کہ سعودی عرب نے صحافی کے قتل پر ہونے والی تحقیقات کی کوئی معلومات شئیرنہیں کیں، صحافی جمال خاشقجی کو گزشتہ سال دو اکتوبر کو استنبول میں سعودی قونصل خانےمیں بے دردی سے قتل کر دیا گیا تھا۔
جمال خاشقجی دو اکتوبر دو ہزار اٹھارہ کو ترکی کے شہر استنبول میں قائم سعودی قونصلیٹ میں داخل ہونے کے بعد لاپتہ ہو گئے تھے اور اٹھارہ دن کے پس و پیش کے بعد سعودی حکام نے ان کے قتل کا اعتراف کر لیا تھا۔
ذرائع ابلاغ کی رپورٹوں کے مطابق سعودی ولی عہد بن سلمان نے جمال خاشقجی کے قتل کا براہ راست حکم دیا تھا۔
