SAHAR

یمن کی مسلح افواج کے ترجمان یحیی السریع نے جارح سعودی اتحاد کے خلاف البنیان المرصوس نامی انتہائی کامیاب آپریشن کی تفصیلات بتاتے ہوئے کہا کہ اس فوجی کارروائی میں یمن کے غصب شدہ دوہزار پانچ سو مربع کلومیٹرعلاقوں کو آزاد کرالیا گیا۔

 

یمنی فوج کے ترجمان نے بتایا کہ اس فوجی آپریشن میں جارح سعودی اتحاد کے پندرہ سو فوجی ہلاک اور اٹھارہ سو دیگر زخمی ہوئے ہیں۔ انہوں نے ایک پریس کانفرنس میں کہا کہ جارح سعودی اتحاد دارالحکومت صنعا تک پہنچنے کے لئے سب سے کم فاصلے والے راستے کو طے کرنے کے لئے مہینوں قبل سے خود کو تیار کر رہا تھا۔ انہوں نے کہا کہ جارح سعودی اتحاد نے صنعا تک پہنچنے کے لئے فوج کی سترہ ڈویژن اور بہت سی بٹالین کو بھاری فوجی ساز و سامان کے ساتھ علاقے میں تیار کررکھا تھا۔ان کا کہنا تھا کہ جارح سعودی اتحاد نے زمین پر اپنی فوجوں کی پیشقدمی کو یقینی بنانے کے لئے فضائیہ کا بھی سہارا لیا تھا لیکن وہ یمن کے ایئرڈیفنس سسٹم کے میزائلوں کے خوف سے اپنے جنگی طیاروں کو بلندیوں پر ہی روکنے پر مجبور رہا۔ یمنی فوج کے ترجمان نے کہا کہ فاطر ایئر ڈیفنس سسٹم نے سعودی جنگی طیاروں کو اپنی جگہ سے ہلنے کی بھی اجازت نہیں دی۔ ان کا کہنا تھا کہ یمنی فوج کی اس شاندار فوجی کارروائی میں سعودی عرب کے متعدد ہوائی اڈوں منجملہ نجران اور جیزان ہوائی اڈوں کو بھی نشانہ بنایا گیا جو فوجی مقاصد کے لئے بھی استعمال ہوتے ہیں۔

 

یمن کی مسلح افواج کے ترجمان نے کہا کہ یمن کے ڈرون اور میزائل یونٹس نے ملک کے اندر اور باہر جارح سعودی اتحاد کے بالترتیب اکتالیس اور اکیس ٹھکانوں پر حملے کئے۔ یمنی فوج کی بنیان المرصوص فوجی کارروائی کی اہمیت کا ایک پہلو یہ ہے کہ اس سے جارح اتحاد کے فوجیوں کی کمزوری کھل کر سامنے آگئی اور انہیں بھاری جانی نقصان اٹھانا پڑا۔ اس کارروائی کی اہمیت کا دوسرا پہلو یہ ہے کہ اس کے دوران بھاری مقدار میں جنگی ساز و سامان یمنی فوج کے ہاتھ لگے اور اب انہیں ہتھیاروں کو جارح سعودی اتحاد کے خلاف استعمال کیا جاسکے گا۔ العہد نیوز ویب سائٹ نے خبردی ہے کہ یمنی فوج کی یہ کارروائی جارح سعودی اتحاد کے لئے ایک اسٹریٹیجک شکست ہے۔