SAHAR

اپنے ایک ٹوئیٹ میں یمن کی مسلح افواج کے ترجمان یحی السریع نے لکھا ہے کہ سعودی جنگی اتحاد نے جنگ بندی کے اعلان کے باوجود پچھلے چوبیس گھنٹے کے دوران یمن کے دو صوبوں مآرب اور الجوف کے ان کے علاقوں پر تیس بار سے زائد فضائی حملے کیے ہیں جنہیں حال ہی میں یمنی فوج اور عوامی رضاکار فورس کے جوانوں نے آزاد کرایا ہے۔

دوسری جانب المسیرہ ٹیلی ویژن نے خبر دی ہے کہ صوبہ تعز میں سعودی جنگی اتحاد کے ایک حملے میں متعدد خواتین اور  بچے شہید ہوئے ہیں۔ رپورٹ کے مطابق سعودی جنگی اتحاد میں شامل کرائے کے فوجیوں نے اپنے وحشیانہ حملے جاری رکھتے ہوئے صوبہ تعز کے رہائشی علاقوں پر گولہ باری کی ہے جس کے نتیجے میں متعدد مکانات بھی تباہ ہو گئے ہیں۔

صوبہ تعز کے شہر صلو میں سعودی اتحاد کی  فائرنگ میں  بھی ایک بے گناہ یمنی خاتون کے بھی مارے جانے کی خبر ہے۔ یمن کے خلاف جنگ اور جارحیت کا سلسلہ ایسے وقت میں جاری ہے جب سعودی جنگی اتحاد کے ترجمان ترکی المالکی نے نو اپریل کو جنگ بندی کا اعلان کرتے ہوئے دعوی کیا تھا کہ دو ہفتے کی اس جنگ بندی میں مزید توسیع کا امکان پایا جاتا ہے، تاہم سعودی جنگی اتحاد نے اپنی ہی اعلان کردہ جنگ بندی کی ایک دن بھی پابندی نہیں کی اور اس  اعلان کے محض چند گھنٹے بعد ہی یمن کے رہائشی علاقوں اور شہری اہداف کو زمینی اور فضائی حملوں کا نشانہ بنانا شروع کردیا۔

درایں اثنا یمن کی مسلح افواج اور عوامی رضاکار فورس کے ایئر ڈیفنس یونٹوں نے صوبہ الحدیدہ پر پرواز کرنے والے سعودی جاسوس طیارے کو مار گرایا ہے۔ عوامی تحریک انصاراللہ کے جاری کردہ بیان کے مطابق سعودی جاسوس طیارے کو اندرون ملک تیار کیے جانے والے ایئر ڈیفنس سسٹم کے ذریعے مار گرایا گیا ہے۔

یمنی فوج اور عوامی رضاکار فورس کے جوان اب تک سعودی جنگی اتحاد کے درجنوں ڈرون اور لڑاکا طیارے گرا چکے ہیں۔