عید الفطر عالم اسلام کو مبارک ہو
دنیا کے اکثر ممالک میں آج عید الفطر مذہبی جوش و جذبے کے ساتھ منائی جا رہی ہے ۔
اسلامی جمہوریہ ایران اور پاکستان سمیت دنیا کے اکثر ممالک میں عیدالفطرآج بروز جمعرات کو مذہبی جوش و جذبے کے ساتھ منائی جا رہی ہے۔
اسلامی جمہوریہ ایران کے تمام چھوٹے بڑے شہروں، قصبوں اور دیہاتوں میں کورونا وائرس کی وجہ سے صحت عامہ کے بنائے گئے اصولوں کے تحت عید الفطر کی نماز کے اجتماعات منعقد ہوئے۔ نماز کے بعد دنیا بھر سے کورونا کے خاتمے ، عالم اسلام کی ترقی و پیشرفت اور مسلمانوں کے مابین اتحاد و وحدت کے لئے خصوصی دعائیں مانگی گئیں، اس کے علاوہ فلسطین کی آزادی اور مسلم ممالک میں جاری فتنہ و فساد کے خاتمے کے لئے بھی اللہ رب العزت کی بارگاہ میں دعا کی گئی۔
پاکستان میں نماز عید کے موقع پر سکیورٹی کے انتہائی سخت انتظامات کیے گئے تھے اور مساجد اور امام بارگاہوں کے باہر پولیس کی بھاری نفری تعینات کی گئی تھی۔
ہندوستان میں شوال کا چاند نظر نہیں آیا اس لئے عید الفطر کل بروز جعمہ 14 مئی کو ہو گی۔
سحرعالمی نیٹ ورک خوشی اور مسرت کے اس موقع پر اپنے تمام سامعین، ناظرین اور کرم فرماوں کی خدمت میں مبارک باد پیش کرتا ہے۔
