لبنان، سعد حریری حکومت بنانے میں ناکام
لبنانی وزیراعظم سعد الحریری نے حکومت بنانے میں ناکامی پر استعفا دے دیا۔
مقامی خبررساں اداروں کے مطابق سعد الحریری نے صدر میشال عون سے طویل مشاورت کے بعد مستعفی ہونے کا فیصلہ کیا ۔ وہ گزشتہ 8 ماہ سے حکومت بنانے میں مصروف تھے جس میں وہ ناکام رہے ۔ اس سے قبل سعد الحریری نے 24 وزرا پر مبنی کابینہ بنانے کا اعلان کیا تھا ، جس میں صدر عون کی پارٹی کو وزارت خارجہ اور وزارت دفاع سمیت 8 وزارتیں دی گئی تھیں ، لیکن اس کے باوجود انہیں اپنی کابینہ بنانے میں مشکلات کا سامنا تھا۔
انہوں نے صحافیوں سے بات کرتے ہوئے کہا کہ میں حکومت بنانے سے پیچھے ہٹ رہا ہوں ، کیوں کہ صدر عون آئین میں چند ترامیم کرنا چاہتے ہیں ، لیکن اس بار ہمارے درمیان اتفاق نہیں ہوسکتا۔
لبنان 2019 ء سے معاشی بحران سے دوچار ہے جس کے باعث ملک گیر احتجاج بھی کیے گئے تھے۔ سعد الحریری اکتوبر 2019 ء میں مستعفی ہوگئے تھے ، تاہم گزشتہ سال ہی لبنانی صدر نے انہیں دوبارہ وزیراعظم بنایا اور ملکی مفاد کی خاطر ساتھ چلنے کی پیشکش کی تھی۔
بعد ازآں اگست 2020 میں بیروت میں ہونے والے ہولناک دھماکے نے رہی سی کسر پوری کردی جس میں 190 سے زيادہ افراد جاں بحق اور 6 ہزار سے زائد زخمی ہوگئے تھے۔
اس المناک واقعے کے بعد لبنان کے وزیراعظم حسان دیاب نے استعفی دیدیا تھا ، حسان دیاب کے استعفے کے بعد ہی سعد حریری کو وزارت عظمی کا قلمدان سونپا گيا تھا۔
