خان یونس میں صیہونی فوجیوں کو بھاری نقصان، ایک مرکاوا ٹینک اور دو فوجی گاڑیاں تباہ
فلسطین کی تحریک جہاد اسلامی کی فوجی شاخ قدس بریگيڈ کے جوانوں نے صیہونی حکومت کے ایک مرکاوا ٹینک اور دو فوجی گاڑیوں کو تباہ کردیا ہے۔
سحرنیوز/عالم اسلام: فلسطینی نیوز ایجنسی شہاب کی رپورٹ کےمطابق قدس بریگيڈ نے ایک بیان میں کہا ہے کہ اس نے صیہونی حکومت کے ایک مرکاوا ٹینک اور اس کی دو فوجی گاڑیوں کو مغربی خان یونس میں آر پی جی سے نشانہ بناکر تباہ کردیا ہے۔ عزالدین قسام بریگيڈ نے بھی شہر خان یونس میں جارح صیہونی فوجیوں کے ساتھ گھمسان کی جنگ اور صیہونی حکومت کی ایک فوجی گاڑی کو تباہ کرنے کی خبر دی ہے۔ عزالدین القسام بریگيڈ نے اعلان کیا ہے کہ اس نے جنوبی غزہ میں ایک صیہونی فوجی گاڑی کو، الیاسین ایک سو پانچ نامی راکٹ سے تباہ کردیا ہے۔
غزہ میں المیادین کے نامہ نگار نے کہا ہے کہ فلسطینی مزاحمت اور صیہونی فوجیوں کے درمیان اس وقت شہر خان یونس کے الامل اور البطن السمن علاقوں میں شدید لڑائی جاری ہے۔ القسام بریگيڈ نے بھی کہا ہے کہ اس نے بھی جمعہ اور ہفتے کی درمیانی رات خان یونس میں الیاسین ایک سوپانچ سے، صہیونی فوج کا ایک مرکاوا ٹینک تباہ کردیا۔
