SAHAR

یمن کی عوامی تحریک انصاراللہ کے رہنما عبدالملک بدرالدین الحوثی نے کہا ہے کہ غزہ میں فلسطینیوں پر جو گذر رہا ہے وہ ایک حقیقی انسانی المیہ ہے اور غزہ کے عوام پر مظالم کے توڑے جانے والے پہاڑ پوری امت مسلمہ کے لئے ایک بڑا سنجیدہ خطرہ ہیں۔

سحرنیوز/عالم اسلام:    یمن کی عوامی تحریک انصاراللہ کے رہنما سید عبدالملک بدرالدین الحوثی نے آسمان امامت و ولایت کے چوتھے درخشاں ستارے فرزند رسول حضرت امام زین العابدین ع کے یوم شہادت کی مناسبت سے ایک بیان میں کہا ہے کہ غزہ میں بھوک سے چھوٹے بچوں کی ہونے والی شہادت کے المناک مناظر سب سے بڑھکر تمام عرب قوموں اور پھر سارے مسلمانوں کے لئے شرمناک اور ان کے ماتھے پر کلنک کا ٹیکہ ہے۔

انھوں نے تاکید کی کہ یمنی عوام نے جب سے غزہ کے خلاف جارحیت کا سلسلہ شروع ہوا ہے فلسطینی عوام کی حمایت میں اپنے دو ٹوک موقف پر تاکید کی ہے۔

انھوں نے کہا کہ یمن نے غزہ کے عوام کی حمایت میں مقبوضہ فلسطین پر مسلسل حملے کئے جبکہ فلسطینیوں کی حمایت کرنے پر یمن کو ہزاروں بار جارحیت کا نشانہ بنایا گیا اور اس کا محاصرہ مزید تنگ تر کیا گیا ۔

سید عبدالملک بدرالدین الحوثی نے کہا کہ یمنی عوام، غزہ کی حمایت میں فوجی اور سماجی شعبوں سمیت تمام شعبوں میں اپنی کاروائياں جاری رکھیں گے اور فلسطینوں کو کبھی تنہا نہیں چھوڑیں گے۔