صوبہ صعدہ میں سعودی لڑاکا طیاروں کی بمباری، آٹھ عام شہری شہید
سعودی عرب کے لڑاکا طیاروں نے یمن کے شمالی صوبے صعدہ میں بمباری کرکے کم سے کم آٹھ عام شہریوں کو شہید کر دیا ہے
المسیرہ ٹیلی ویژن چینل نے خبردی ہے کہ سعودی عرب کے لڑاکاطیاروں نے یمن کے صوبہ صعدہ کے رازح علاقے کے بازار میں بمباری کر دی جس میں آٹھ عام شہری شہید ہوگئے اس حملے میں متعدد افراد زخمی بھی ہوئے ہیں - خبروں میں یہ بھی بتایا گیا ہے کہ سعودی طیاروں نے رازح میں کلسٹر بموں سے حملہ کیا ہے -
المسیرہ ٹیلی ویژن نے یہ بھی خبر دی ہے کہ سعودی عرب کے جنگی طیاروں نے صوبہ صعدہ کے مجز علاقے میں بھی حملہ کیا ہے جس میں رہائشی علاقے نشانہ بنے ہیں - بعض خبروں میں یہ بھی کہا گیا ہے کہ سعودی عرب کے جنگی طیاروں نے رازح میں ڈاکٹروں کی عالمی تنطیم کے ایک اسپتال کو نشانہ بنایا جس میں متعدد افراد مارے گئے ہیں -
گذشتہ برس چھبیس مارچ سے یمن کے مختلف شہروں پر سعودی عرب اوراس کے اتحادی ملکوں کے ہوائی حملوں میں ساڑھے سات ہزارعام شہری شہید اور چودہ ہزار سے زیادہ زخمی ہوئے ہیں جبکہ لاکھوں کی تعداد میں لوگ بے گھر ہوئے ہیں-
