پاکستان : توہین رسالت کے خلاف مذمتی قرارداد منظور
پاکستانی سینیٹ میں سوشل میڈیا پرنبی اکرم (ص) اور صحابہ کرام سے متعلق قابل اعتراض مواد کے خلاف متفقہ مذمتی قرارداد منظور کرلی گئی۔
پاکستان کے ایوان بالا سینیٹ کے اجلاس کے دوران مسلم لیگ (ق) کے سینیٹر کامل علی آغا نے توہین رسالت کے خلاف قرارداد پیش کی۔ قرارداد میں کہا گیا کہ پاکستان کا قانون ناموس رسالت اورناموس انبیاء کو تحفظ دیتا ہے، ہم انبیاء کی توہین کی اجارت نہیں دے سکتے، حالیہ دنوں میں کچھ عناصر نے قانون کی دھجیاں بکھیرتے ہوئے شان رسالت میں گستاخی کی، حکومت ایسے گستاخانہ مواد کو روکے، گستاخانہ مواد پھیلانے والے اور ان کے سہولت کاروں کو نشان عبرت بنادے۔ جسے ایوان نے متفقہ طور پر منظور کرلیا۔
قرارداد کی منظوری سے قبل قائد حزب اختلاف بیرسٹر اعتزاز احسن نے اظہار خیال کرتے ہوئے کہا کہ جلوس اور ویب سائٹس کی بندش اس معاملے کا حل نہیں، شیطانی حرکتیں کرنے والوں کے ہاتھوں یرغمال نہیں ہوسکتے، ہمیں ایسے اقدامات کرنا ہوں گے جن سے اہداف کا حصول ممکن ہو، اس سلسلے میں ایوان بالا قوم کی رہنمائی کرے.
