نواز شریف ایک ہفتے کے مہمان: عمران خان کا اعلان
عمران خان نے کہا ہے کہ نواز شریف اب صرف ایک ہفتے کے مہمان ہیں ۔
پاکستان تحریک انصاف کے چیئرمین عمران خان کا کہنا ہے کہ وزیراعظم نواز شریف کا قصہ تمام ہو چکا اور طویل تاریک رات بالآخر ختم ہو گئی ہے۔ عمران خان نے کہا کہ اب وزیراعظم نواز شریف کے خلاف فوجداری کارروائی ہو گی، شریف خاندان نے عدالت میں جھوٹ بولا اور ان کا سارا دفاع فراڈ پر مبنی تھا۔ انہوں نے یہ دعویٰ بھی کیا کہ اگر عدالت نے وزیراعظم کو عہدے سے ہٹا دیا تو رواں برس کے اختتام تک ملک میں قبل از وقت انتخابات ہوتے نظرآرہے ہیں۔ امید ہے کہ اگلا ہفتہ بطور وزیراعظم نواز شریف کا آخری ہفتہ ہوگا اور اسلام آباد میں آئندہ ہفتے وزیراعظم کو رخصت کرنے کرنے لیے بڑی پارٹی ہو گی۔
واضح رہے کہ پاناما جے آئی ٹی نے گزشتہ ہفتے اپنی تحقیقاتی رپورٹ سپریم کورٹ میں جمع کرا دی تھی جس کے بعد سپریم کورٹ نے اس رپورٹ پر مزید جرح کے لیے پیر 17 جولائی کو سماعت مقرر کی ہے اور فریقین کو ہدایت کی ہے کہ وہ اس کیس میں پہلے دیئے گئے دلائل کو دہرانے سے گریز کریں۔ پاکستان تحریک انصاف اور دیگر اپوزیشن جماعتیں اس رپورٹ کے منظر عام پر آنے کے بعد وزیراعظم نواز شریف سے استعفے کا مطالبہ کر رہی ہیں جبکہ حکمراں جماعت کا کہنا ہے کہ وزیراعظم مخالفین کا ڈٹ کا مقابلہ کریں گے اور کسی صورت استعفیٰ نہیں دیں گے۔ اس قسم کے بیانات کے بعد پاکستان ایک بار پھر سیاسی بحران کا شکار دکھائی دے رہا ہے۔
