SAHAR

پاکستان کے صوبہ بلوچستان کے شہر حب میں ایران سے پنجاب جانے والی زائرین کی بس کوسٹل ہائی پر کھائی میں جاگری جس کے نتیجے میں 10 افراد جاں بحق ہوگئے۔

سحرنیوز/پاکستان: پاکستانی میڈیا کی رپورٹ کے مطابق حادثہ بزی ٹاپ کے قریب پیش آیا جہاں پر بریک فیل ہونے پر بس کھائی میں گر گئی۔ ایران سے  آنے والی بس زائرین کو لے کر پنجاب جا رہی تھی، زائرین کا تعلق لاہور اور گوجرانوالہ سے ہے۔ رپورٹ کے مطابق اس حادثے میں 10 افراد کی اموات ہوئی ہیں جبکہ 30 سے زیادہ افراد زخمی بھی ہوئے ہیں۔ پولیس کا کہنا ہے کہ زخمیوں اور جاں بحق افراد کی میتوں کو قریبی اسپتالوں میں منتقل کیا جا رہا ہے۔
یاد رہے کہ 21 اگست کو ایرانی شہر یزد میں پاکستانی زائرین کی بس خوفناک حادثے کا شکار ہو گئی تھی، جس کے نتیجے میں 28 افراد جاں بحق ہوگئے تھے۔