پاکستان کے صوبۂ پنجاب میں پولیس نے خوارج کا ایک اور حملہ ناکام بنا دیا
پاکستان کے صوبۂ پنجاب میں واقع ضلع ڈیرہ غازی خان میں بارڈر چیک پوسٹ پر خارجی دہشت گردوں نے حملہ کیا جسے پولیس نے جوابی کارروائی سے حملہ ناکام بنا دیا ۔
سحرنیوز/پاکستان: پاکستانی میڈیا کے مطابق ترجمان پنجاب پولیس نے بتایا ہے کہ 15 سے 20 دہشت گردوں نے سرحدی چوکی لکھانی پر سحری کے وقت حملہ کیا۔ دہشت گرد خیبرپختونخوا سے ٹولیوں کی صورت میں حملہ آور ہوئے اور انہوں نے حملے میں راکٹوں سمیت بھاری ہتھیار استعمال کیے۔ ترجمان پنجاب پولیس نے مزید کہا کہ جوانوں کے الرٹ ہونے کے سبب تھرمل امیج کیمروں سے دہشت گردوں کی نشاندہی کی گئی اور پولیس نے مشین گنز اور مارٹر سے دہشت گردوں کے خلاف جوابی کارروائی کی جس کے باعث دہشت گرد چیک پوسٹ کے قریب پہنچنے میں ناکام اور پسپائی پر مجبور ہوگئے۔ واضح رہے کہ 6 روز قبل بھی خوارجی دہشت گردوں کا چیک پوسٹ لکھانی پر حملہ ناکام بنایا گیا تھا۔
