سلامتی کونسل میں صہیونی حکومت پر کڑی تنقید؛ پاکستان
اقوام متحدہ میں پاکستان کے مستقل مندوب نے کہا ہے کہ فلسطین میں جو کچھ ہو رہا ہے وہ انسانیت کے ساتھ سنگین مذاق ہے۔
سحرنیوز/پاکستان: اقوام متحدہ میں پاکستان کے مستقل مندوب عاصم افتخار نے سلامتی کونسل کے اجلاس سے خطاب کرتے ہوئے کہا کہ اسرائیل، یو این کی قراردادوں اور جنگ بندی کے معاہدے کی خلاف ورزی کر رہا ہے لہذا سلامتی کونسل، غزہ پر خاموشی توڑ کر اپنا کردار ادا کرے۔
ان کا کہنا تھا فلسطین میں جو کچھ ہو رہا ہے وہ انسانیت کے ساتھ سنگین مذاق ہے، ہم ایسے ادارے کاحصہ نہیں بن سکتے جو خاموش تماشائی بنا رہے۔انہوں نے مزید کہا کہ ہم اس اخلاقی دیوالیہ پن کا حصہ بننے سے انکار کرتے ہیں، سلامتی کونسل اپنی ساکھ برقرار رکھنے کیلئے اپنی قراردادوں پر عملدرآمد یقینی بنائے۔
یاد رہے سلامتی کونسل کا حالیہ اجلاس پاکستان، روس، چین اور صومالیہ کی حمایت سے الجزائر نے طلب کیا۔
