SAHAR

پاکستانی وزیر داخلہ سید محسن نقوی کی جانب سے اربعین امام حسین علیہ السلام کے لئے زمینی راستے سے کربلا جانے پر پابندی کے اعلان کے خلاف پاکستان کی مذہبی اور سیاسی جماعتوں کی جانب سے ردعمل ظاہر کیا جا رہا ہے۔

سحرنیوز/پاکستان: مجلس وحدت المسلمین نے ایک بیان جاری کر کے کہا ہے کہ حکومت نے اپنے اس فیصلے کے ذریعے کروڑوں زائرین کے جذبات کو ٹھیس پہنچائی ہے۔ مجلس وحدت المسلمین کے جنرل سیکرٹری ناصر عباس شیرازی نے ایک بیان میں کہا ہے کہ ہر سال ہزاروں پاکستانی زائرین زمینی راستے سے ایران اور عراق جاتے ہیں اور حکومت کے اس اچانک فیصلے سے حکومت کی نااہلی کی نشاندہی ہوتی ہے۔

وفاق المدارس الشیعہ پاکستان کے صدر حافظ ریاض حسین نجفی کا کہنا ہے کہ سڑک کے راستے سفر پر پابندی عائد کرنا حکومت کی طرف سے ناکامی کا اعتراف ہے۔ سوشل میڈیا پر بھی ۔حکومت کے اس فیصلے کو ہدف تنقید بنایا جا رہا ہے۔

سیو زائرین جیسے ہیش ٹیگ کے ساتھ حکومت سے اپنے فیصلے پر نظر ثانی کا مطالبہ کیا جا رہا ہے۔ واضح رہے کہ پاکستانی حکومت کا کہنا ہے کہ اس نے وزارت خارجہ ، بلوچستان کی صوبائی حکومت اور سیکورٹی اداروں کی مشاورت کے بعد حضرت امام حسین علیہ السلام کے چہلم کے موقع پر زمینی راستے سے کربلا جانے پر پابندی لگانے کا فیصلہ کیا ہے۔ جس کا مقصد امن و امان کی برقراری اور قومی مفادات کا تحفظ ہے۔