دریائے ستلج میں طغیانی، زمیندارہ بند ٹوٹنے سے متعدد مکانات متاثر
بہاولپور میں دریائے ستلج کا ریلا بپھرنے سے زمیندارہ بند ٹوٹ گئے اور پانی ملحقہ آبادیوں میں داخل ہونے سے کئی مکانات ڈھ گئے۔
سحرنیوز/پاکستان: موضع ساہلاں میں دریائے ستلج کی طغیانی کے باعث زمیندارہ بند ٹوٹ گیا، جس کے نتیجے میں پانی بستی حسین آباد اور ملحقہ علاقوں میں داخل ہو گیا۔ اس سانحے کے باعث کئی مکانات زمین بوس ہو گئے اور علاقہ مکینوں نے محفوظ مقامات کی جانب نقل مکانی شروع کر دی۔
ادھر ہیڈ تریموں سے نکلنے والے نئے سیلابی ریلے کی آمد کے پیش نظر انتظامیہ نے دوبارہ ریڈ الرٹ جاری کر دیا ہے۔ ڈپٹی کمشنر ملتان کے مطابق ہیڈ تریموں سے 4 لاکھ 14 ہزار کیوسک سے زائد پانی کا ریلا آئندہ دو روز میں ملتان کے بندوں سے ٹکرائے گا۔ شہریوں کو ہدایت کی گئی ہے کہ وہ دریائی علاقوں میں واپسی سے گریز کریں۔
ملتان کے ڈپٹی کمشنر نے مزید بتایا کہ موجودہ ریلے کی ملتان کی دریائی حدود سے سست رفتاری سے نکلنے پر تشویش ہے۔ اس ریلے نے شجاع آباد اور جلالپور پیروالا کے متعدد علاقوں کو نقصان پہنچایا ہے۔ 36 گھنٹے گزرنے کے باوجود پانی کی سطح میں کمی نہ آنے کے باعث اگر نئے ریلے کی شدت میں اضافہ ہوا تو بریچنگ پر دوبارہ غور کیا جائے گا۔
دوسری جانب ڈی جی پی ڈی ایم اے پنجاب، عرفان علی کاٹھیا نے سیلابی صورتحال پر بریفنگ دیتے ہوئے بتایا کہ گجرات میں شدید بارشوں کے باعث مرکزی نالوں میں بریچنگ ہوئی، جس سے اربن فلڈنگ کی صورتحال پیدا ہوئی۔ نکاسی آب کے لیے مشینری پہنچا دی گئی ہے اور توقع ہے کہ آئندہ 12 سے 18 گھنٹوں میں حالات بہتر ہو جائیں گے۔
