یمن کے امور میں اقوام متحدہ کے نمائندے کی سلامتی کونسل میں رپورٹ
-
یمن کے امور میں اقوام متحدہ کے سیکریٹری جنرل کے خصوصی نمائندے، اسماعیل ولد الشیخ احمد
یمن کے امور میں اقوام متحدہ کے سیکریٹری جنرل کے خصوصی نمائندے نے یمن کا بحران جاری رہنے اور ایک انسانی المیہ رونما ہونے کے بارے میں خبردار کیا ہے۔
اسکائی نیوز کے مطابق اسماعیل ولد الشیخ احمد نے بدھ کے روز اقوام متحدہ کی سلامتی کونسل کو یمن کے بارے میں پیش کی گئی اپنی رپورٹ میں کہا ہے کہ بحران یمن کے فریقوں کے درمیان پائے جانے والے گہرے اختلافات، مذاکرات کے نئے دور کے انعقاد میں رکاوٹ بن رہے ہیں۔
اسماعیل ولد الشیخ احمد نے یمن میں خطرناک انسانی صورت حال کے بارے میں خبردار کیا اور تمام فریقوں سے اپیل کی کہ وہ یمن میں جنگ بندی کر کے سیاسی مفاہمت تک پہنچنے کا راستہ ہموار کریں۔
یمن کے امور میں اقوام متحدہ کے خصوصی نمائندے نے کہا کہ عدن، لحج، شبوہ اور صنعا صوبوں میں جھڑپیں تیز ہو گئی ہیں اور یمنی فوج کی چیک پوسٹوں، فوجی کمانڈروں اور سیکورٹی حکام کے گھروں پر حملوں میں اضافہ ہو گیا ہے۔ انھوں نے یمن میں دہشت گردوں کی موجودگی کے بارے میں کہا کہ دہشت گرد گروہ القاعدہ اور داعش کے افراد، یمن کے مختلف علاقوں میں موجود ہیں اور وہ تیل کی غیرقانونی تجارت میں بھی مصروف ہیں۔
