رابرٹ ایف کینیڈی کا بڑا بیان، امریکہ نے داعش کو بنایا
امریکی صدارتی انتخابات کے امیدوار اور اس ملک کے مقتول سابق صدر کے بھتیجے نے امریکی صدارتی انتخابات میں اپنی امیدواری کا اعلان کرتے ہوئے اپنے خطاب میں اعتراف کیا کہ واشنگٹن نے دہشت گرد گروہ داعش کو بنایا اور اس ملک کی پولیس بھی کرپٹ ہے۔
سحر نیوز/ دنیا: سابق امریکی صدر جان ایف کینیڈی کے بھتیجے رابرٹ ایف کینیڈی نے بدھ کو 2024 کے صدارتی انتخابات میں ڈیموکریٹک پارٹی کے نمائندے کے طور پر اپنی امیدواری کا باضابطہ اعلان کیا۔
وہ کورونا ویکسین کے کٹر مخالفین میں سے تھے اور انسٹاگرام نے 2021 میں ویکسین کے بارے میں گمراہ کن مواد شائع کرنے پر ان کا اکاؤنٹ بند کر دیا تھا۔
امریکی صدارتی انتخابات کے لیے اپنی امیدواری کا اعلان کرنے کے لیے اپنے بیانات کے دوران انھوں نے کہا کہ امریکی پولیس بدعنوان ہے اور یہ واشنگٹن ہی تھا جس نے دہشت گرد گروہ داعش کو بنایا۔
کینیڈی نے یہ بھی کہا کہ امریکی متوسط طبقہ سابقہ امریکی انتظامیہ کے اقدامات سے تباہ ہو چکا ہے۔
صدارتی انتخاب کے لیے اپنی امیدواری کا اعلان کرتے ہوئے اپنی تقریر میں انھوں نے کہا کہ پولیس کرپٹ ہے، ہم نے داعش کو بنایا، ہم نے 20 لاکھ مہاجرین کو یورپ بھیجا اور وہاں جمہوریت کو غیر مستحکم کیا جس کی وجہ سے بریگزیٹ ہوا۔ یہ عراق جنگ کی قیمت ہے، ہم نے وہاں 8 ٹریلین ڈالر خرچ کیے اور ہم نے کورونا شٹ ڈاؤن پر 16 ٹریلین ڈالر خرچ کیے اور مجموعی طور پر 24 ٹریلین ڈالر خرچ ہوئے اور اس نے امریکہ میں متوسط طبقے کو تباہ کرنے کے سوا کچھ نہیں کیا، ہمیں اس صورتحال کو ختم کرنا ہوگا۔
انہوں نے مزید کہا کہ اس ملک میں ہماری حکمت عملی ہمیشہ سے یہ رہی ہے کہ طاقت دکھانے کے لیے فوجی ہتھیاروں کا استعمال کیا جائے، دنیا بھر میں طاقت دکھانے کے لیے فوج کا استعمال کیا جائے لیکن چینیوں نے کچھ مختلف کیا ہے، انہوں نے میرے عمومی فلسفے اور حکمت عملی کو اپنایا ہے، ہم نے پلوں، بندرگاہوں، سڑکوں اور ہسپتالوں کو بموں سے اڑانے کے لیے آٹھ ٹریلین ڈالر خرچ کیے لیکن انھوں نے پل، بندرگاہیں، سڑکیں، اور ہسپتال بنانے کے لیے آٹھ ٹریلین ڈالر خرچ کیے ہیں۔ وہ بیشتر افریقی اور لاطینی امریکی ممالک میں تجارتی شراکت داروں کے طور پر ہماری جگہ لے رہے ہیں، برازیل نے حال ہی میں ڈالر کی جگہ چینی کرنسی اپنا لی ہے، سعودی عرب نے بھی ایسا ہی کیا۔
