حزب اللہ سے زمینی جنگ میں صیہونی فوج کی شکست کا اعتراف، عبرانی میڈیا کی رپورٹ
صیہونی میڈیا نے زمینی جنگ میں حزب اللہ سے اسرائیلی فوج کی شکست کا اعتراف کیا ہے۔
سحرنیوز/دنیا: صہیونی اخبار یدیعوت احارونوت نے مقبوضہ علاقوں اور جنوبی لبنان کے سرحدی علاقے میں حزب اللہ کے ساتھ زمینی لڑائی میں اسرائیلی فوج کی کارکردگی پر تنقید کرتے ہوئے لکھا ہے کہ فوج کا ایک بڑا دستہ چار ہفتوں کے دوران جنوبی لبنان کے ایک گاؤں پر بھی قبضہ نہیں کر سکا ہے۔
اس اخبار نے مزید لکھا کہ ان فوجیوں کی تعداد، دوہزار چھ میں اسرائیل اور لبنان کے درمیان تینتیس روزہ جنگ میں حصہ لینے والے فوجیوں سے تین گنا زیادہ ہے۔ اس سلسلے میں صیہونی حکومت کی فوج کے ریزرو جنرل ران کوخاف نے بھی اس حکومت کے حکام کے اس دعوے کو مسترد کرتے ہوئے کہ حزب اللہ کی میزائلی طاقت کا ایک بڑا حصہ تباہ ہو گیا ہے کہا کہ یہ دعوی غلط ہے کہ اسرائیلی فوج نےحزب اللہ کی آدھی میزائل طاقت کو تباہ کر دیا ہے۔ اسی دوران صہیونی اخبارھاآرٹض نے غزہ کی پٹی اور لبنان سے ملحقہ سرحد پر جنگی محاذوں میں اسرائیلی فوج کی بوکھلاہٹ کے بارے میں خبر دی ہے اور لکھا ہے کہ اسرائیلی فوج تھک چکی ہے اور مقبوضہ علاقوں کے جنوب اور شمال میں جنگ کے خاتمے کے لئے ایک معاہدہ طے پا جانا چاہیے۔
