اسرائیلی فوجیوں کے ہاتھوں فلسطینی مکانات تباہ ہو رہے ہیں؛ اقوام متحدہ کی رپورٹ
اقوام متحدہ نے خبردار کیا ہے کہ مقبوضہ مغربی کنارے میں صہیونی فوجیوں کی کارروائیوں کے نتیجے میں فلسطینی گھروں اور بنیادی ڈھانچے کو منظم طریقے سے تباہ کیا جارہا ہے۔
سحرنیوز/دنیا: اقوام متحدہ کے ادارہ برائے فلسطینی مہاجرین انروا کے سربراہ فیلیپ لازارینی نے خبردار کیا ہے کہ مقبوضہ مغربی کنارے میں صہیونی فوجیوں کی کارروائیوں کے نتیجے میں فلسطینی گھروں اور بنیادی ڈھانچے کو منظم طریقے سے تباہ کیا جارہا ہے۔ انہوں نے کہا کہ صیہونی قابض فوج مغربی کنارے کے شمالی علاقوں، خاص طور پر جنین اور طولکرم کے پناہ گزین کیمپوں میں فوجی کارروائیاں تیز کر رہی ہے، جس کے نتیجے میں ہزاروں فلسطینی اپنے گھروں سے بے گھر ہوگئے ہیں۔
لازارینی نے سوشل میڈیا پلیٹ فارم ایکس پر کہا ہے کہ گزشتہ روز اسرائیلی حکام نے جنین کیمپ میں مزید چھیاسٹھ عمارتوں کی مسماری کا حکم جاری کیا ہے۔ گذشتہ دو ماہ کے دوران درجنوں فلسطینی گھروں کو تباہ کردیا گیا ہے۔
انہوں نے مطالبہ کیا کہ فلسطینی گھروں کے انہدام کے یہ احکامات منسوخ کیے جانے چاہئیں کیونکہ یہ اقدامات ہزاروں پناہ گزین فلسطینیوں کو دوبارہ طویل مدتی دربدری کا سامنا کرنے پر مجبور کرسکتے ہیں۔انہوں نے کہا کہ ان کارروائیوں سے جنین کیمپ کی جغرافیائی اور سماجی ساخت مستقل طور پر تبدیل ہوسکتی ہے۔
