غزہ فلسطین کا اٹوٹ حصہ، آزاد فلسطینی ریاست کے قیام پر زور؛ چین اور ملائیشیا کا مشترکہ بیان
چین اور ملائیشیا نے ایک مشترکہ بیان میں آزاد فلسطینی ریاست کے قیام پر زور دیتے ہوئے کہا ہے کہ غزہ فلسطین کا اٹوٹ حصہ ہے۔
سحرنیوز/دنیا: چین اور ملائیشیا کے سربراہان مملکت نے ایک مشترکہ بیان جاری کیا ہے جس میں اس بات پر زور دیا گیا ہے کہ غزہ فلسطین کا اٹوٹ حصہ ہے اور ہم اس کے باشندوں کی جبری نقل مکانی کی مخالفت کرتے ہیں۔
چینی صدر شی جن پنگ کے ملائیشیا کے سرکاری دورے کے دوران جاری ہونے والے بیان میں کہا گیا ہے کہ دونوں ممالک غزہ کے رہائشیوں کی جبری نقل مکانی کی مخالفت کرتے ہیں اور دو ریاستی حل کی بنیاد پر ایک آزاد فلسطینی ریاست کے قیام کا مطالبہ کرتے ہیں۔
بیان میں اس بات پر زور دیا گیا ہے کہ فلسطین پر فلسطینیوں کی حکمرانی ایک اہم اصول ہے جس پر عمل کیا جانا چاہیے۔ چین اور ملائیشیا ایک آزاد فلسطینی ریاست کے قیام اور اقوام متحدہ میں فلسطین کی مکمل رکنیت کا مطالبہ کرتے ہیں۔
