یمن پر امریکی بمباری کی مذمت؛ ایران کی وزارت خارجہ
ایران کے دفترخارجہ کے ترجمان اسماعیل بقائی نے گزشتہ دن اور رات کے دوران الجوف، صعدہ اور صنعا صوبوں کے مختلف علاقوں پر امریکی فوج کے مسلسل حملوں اور رہائشی علاقوں نیز بنیادی شہری ڈھانچوں پر بمباریوں کی سخت مذمت کی ہے۔
سحرنیوز/ایران: اسلامی جمہوریہ ایران کی وزارت خارجہ کے ترجمان اسماعیل بقائی نے یمن کی ارضی سالمیت اور اقتدار اعلی کے خلاف کھلی جارحیت کو اقوام متحدہ کے منشور اور بین الاقوامی قوانین کی آشکارا پامالی قرار دیا ہے۔ اس رپورٹ کے مطابق اسماعیل بقائی نے کہا ہے کہ یمن کے رہائشی علاقوں اور حیاتی اہمیت کی شہری تنصیبات پر ہونے والے یہ حملے، جنگی اور انسانیت کے خلاف جرائم ہیں۔ اسلامی جمہوریہ ایران کے دفتر خارجہ کے ترجمان نے امریکی کی کھلی قانون شکنی اور بے گناہ انسانوں کے قتل عام پر اقوام متحدہ اور سلامتی کونسل کے بے عملی کو افسوسناک قرار دیا ہے۔
انہوں نے غزہ اور غرب اردن میں مظلوم فلسطینی عوام کی نسل کشی کشی پر مبنی غاصب صیہونی حکومت کے جرائم اور لبنان کے خلاف اس کے دہشت گردانہ اقدامات کے ساتھ ہی یمن کے خلاف امریکی جارحیت جاری رہنے کو مغربی ایشیا میں بدامنی کا موجب قرا دیا ہے۔
