محمد سراج کی قاتلانہ بولنگ نے انگلینڈ کو آخری ٹیسٹ میج میں دی شکست
انگلینڈ نے ہندوستان کے خلاف جیتا ہوا ٹیسٹ میچ ہار کر سیریز جیتنے کا موقع بھی گنوا دیا پانچ میچوں کی سیریز 2 دو سے برابر ہو گئی۔
سحرنیوز/کھیل: انگلینڈ اور ہندوستان کے درمیان اوول میں کھیلے جا رہے پانچویں اور آخری ٹیسٹ میچ میں میزبان ٹیم جیت کے لیے درکار 35 رنز بنانے میں ناکام رہی اور ہندوستان نے چار انگلش بلے بازوں کی وکٹیں لے کر 6 وکٹ سے میچ اپنے نام کیا اور سیریز 2، 2 سے برابر کرنے میں کامیاب رہی۔ ہیری بروک اور جو روٹ کی سنچریاں بھی رائیگاں گئیں۔
ہندوستان کی جانب سے پہلی اننگ میں بنائے گئے 224 رنز کے جواب میں انگلش ٹیم نے 247 رنز بنا کر صرف 23 رنز کی معمولی برتری حاصل کی تھی۔
تاہم مہمان ٹیم نے دوسری اننگ میں بہترین کارکردگی کا مظاہرہ کیا۔ یشوی جیسوال کی سنچری اننگ (118)، آکاش دیپ، رویندرا جڈیجہ اور واشنگٹن سندر کی نصف سنچریوں سے تقویت پاتے ہوئے 396 رنز بنائے اور میزبان ٹیم کو جیت کے لیے 374 رنز کا ہدف دیا تھا۔
میچ کے چوتھے روز انگلینڈ کی ٹیم نے ہیری بروک اور جو روٹ کی سنچریوں کی بدولت مضبوط پوزیشن حاصل کر لی تھی۔ چوتھے روز میچ کے اختتام پر انگلش ٹیم نے 6 وکٹوں کے نقصان پر 339 رنز بنا لیے تھے۔
میچ کے آخری روز انگلش ٹیم کو جیت کے لیے صرف 35 رنز درکار تھے جب کہ ہندوستان کو چار وکٹیں اڑانی تھیں۔ بظاہر انگلش ٹیم کی پوزیشن مضبوط لگ رہی تھی تاہم بھارتی بولرز نے کمال کارکردگی کا مظاہرہ کرتے ہوئے انگلینڈ کے چار بلے بازوں کو 35 رنز نہ بنانے دیے اور آخری چار وکٹیں لے کر 6 وکٹوں سے فتح اپنے نام کی۔
میچ کے ہیرو ہندوستانی پیسر محمد سراج رہے۔ جنہوں نے پہلی اننگ میں 4 اور دوسری اننگ میں 5 وکٹیں لیں اور میچ میں مجموعی طور پر 9 وکٹیں لے کر میچ کے بہترین کھلاڑی قرار پائے۔
انگلش بیٹر ہیری بروک کو سیریز میں 481 رنز بنانے پر سیریز کا بہترین کھلاڑی قرار دیا گیا۔
واضح رہے کہ انگلینڈ اور ہندوستان کے درمیان پانچ ٹیسٹ میچوں پر مشتمل سیریز کا پہلا میچ انگلینڈ نے پانچ وکٹوں سے اپنے نام کر کے سیریز میں فاتحانہ آغاز کیا، لیکن دوسرے میچ میں ہندوستان نے بدلہ چکاتے ہوئے میچ میں 336 رنز کی بڑی فتح حاصل کی۔
تیسرے میچ میں پھر انگلینڈ نے ہندوستان کو 22 رنز سے زیر کیا۔ چوتھا میچ ڈرا ہو گیا۔ پانچواں اور آخری میچ ہندوستان نے اپنے نام کیا اور سیریز دو، دو سے برابر کرنے میں کامیاب رہا۔
