ہندوستان نے پہلے ٹی-20 میچ میں نیوزی لینڈ کو 48 رنز سے شکست دی
ہندوستان نے پہلے ٹی-20 میں ابھیشیک شرما کی 84 رنز کی اننگز اور گیندبازوں کی عمدہ کارکردگی کی بدولت نیوزی لینڈ کو 48 رنز سے شکست دے کر 5 میچوں کی سیریز میں 1-0 کی برتری حاصل کر لی۔
سحرنیوز/کھیل: ٹاس جیت کر پہلے گیند بازی کا فیصلہ کرنے والی نیوزی لینڈ ٹیم کو ابتدا میں کامیابی ملی اور ہندوستان کی دو وکٹیں 27 رنز پر گر گئیں، مگر اس کے بعد کپتان سوریہ کمار یادو اور ابھیشیک شرما نے اننگز کو سنبھالا اور جارحانہ انداز اپناتے ہوئے اسکور کو تیزی سے آگے بڑھایا۔ دونوں کے درمیان تیسرے وکٹ کے لیے 99 رنز کی اہم شراکت قائم ہوئی۔ سوریہ کمار یادو نے 22 گیندوں پر 32 رنز بنائے، جبکہ ابھیشیک شرما نے 35 گیندوں پر 84 رنز کی شاندار اننگز کھیلی، جس میں 5 چوکے اور 8 چھکے شامل تھے۔
درمیانی اوورز میں ہاردک پانڈیا نے تیز رفتار 25 رنز جوڑے، تاہم شیوم دوبے اور اکشر پٹیل زیادہ دیر کریز پر نہ رک سکے۔ آخری اوورز میں رنکو سنگھ نے جارحانہ بلے بازی کا مظاہرہ کیا اور 20 گیندوں پر ناقابل شکست 44 رنز بنائے، جس سے ہندوستان نے مقررہ 20 اوورز میں 7 وکٹوں کے نقصان پر 238 رنز کا بڑا اسکور کھڑا کیا۔
رنز کے ہدف کے تعاقب میں نیوزی لینڈ کی شروعات نہایت خراب رہی اور ابتدائی دو وکٹیں صرف دو رنز پر گر گئیں۔ اس دباؤ کے باوجود گلین فلپس نے ٹم رابنسن کے ساتھ ذمہ داری سنبھالی اور رنز بنانے کی کوشش کی۔ بعد میں مارک چیپ مین نے بھی فلپس کا ساتھ دیا، مگر وقفے وقفے سے وکٹیں گرتی رہیں۔ گلین فلپس نے 78 رنز کی دلیرانہ اننگز کھیلی لیکن وہ ٹیم کو فتح سے ہمکنار نہ کر سکے۔
ہمیں فالو کریں:
Follow us: Facebook, X, instagram, tiktok whatsapp channel
ہندوستانی گیندبازوں نے آخری اوورز میں نظم و ضبط برقرار رکھا اور نیوزی لینڈ کو 7 وکٹوں پر 190 رنز تک محدود کر دیا۔ اس طرح ہندوستان نے مقابلہ 48 رنز سے اپنے نام کیا۔ شاندار بلے بازی پر ابھیشیک شرما کو پلیئر آف دی میچ قرار دیا گیا۔
