ہندوستانیوں پرحملے: مودی کی خاموشی پرکانگریس کی تنقید
بیرون ملک ہندوستانیوں پر ہوئے کئی نسلی حملوں کے معاملے میں وزیر اعظم نریندر مودی کی خاموشی پر کانگریس نے سوال کھڑے کئے ہیں۔
کانگریس پارٹی کے نائب صدر راہل گاندھی نے رام لیلا میدان میں ایک ریلی سے خطاب کرتے ہوئے کہا کہ جب امریکہ میں ہمارے نوجوان مارے جا رہے ہیں، ان پر گولیاں برسائی جا رہی ہیں تو نریندر مودی چپ کیوں ہیں؟ انہوں نے ایک بھی لفظ کیوں نہیں کہا، کیونکہ نریندر مودی جھوٹ کی سیاست کرتے ہیں۔ انہوں نے کہا کہ مودی اوباما کو گلے لگاتے ہیں لیکن جب ہمارے لوگ مارے جا رہے ہیں تو وزیراعظم ایک بھی لفظ نہیں بولتے ہیں کیونکہ وہ ڈرے ہوئے ہیں اس لئے خاموش ہیں۔
دوسری جانب کانگریس کے ترجمان رنديپ سرجے والا نے کہا کہ ہند نژاد لوگ اور ہندوستانی شہری مارے جا رہے ہیں، ان کو دھمکیاں دی جا رہی ہیں، انہیں مختلف ممالک سے واپس لوٹنے کے لئے کہا جا رہا ہے لیکن حکومت اس معاملے پر خاموش ہے۔
