ہندوستان: سہارنپور میں ٹریکٹر ٹرالی نالے میں گری، 9 افراد ہلاک
ہندوستان کی ریاست اترپردیش کے ضلع سہارنپور کے تاج پورا علاقے میں ایک ٹریکٹر ٹرالی کے حادثے میں 9 افراد ہلاک ہوگئے ہیں۔
سحرنیوز/ ہندوستان: ہندوستانی ذرائع ابلاغ کے مطابق پولیس نے جمعرات کو بتایا کہ ریاست اترپردیش کے ضلع سہارنپور کے تاج پورا علاقے میں ایک ٹریکٹر ٹرالی کے بڑے نالے میں گرنے سے 9 افراد ہلاک ہوگئے ہیں اور ہلاک شدگان میں 4 بچے شامل ہیں۔
پولیس سپرنٹینڈینٹ ابھیمنیو مانگلک نے خبر رساں ایجنسی پی ٹی آئی کو بتایا کہ یہ حادثہ بدھ کی شام کو اس وقت ہوا جب ایک ٹریکٹر ٹرالی تقریبا 50 عقیدت مندوں کو ایک مذہبی پروگرام میں شرکت کے لئے لے کر ایک دیگر گاؤں جارہی تھی۔ یہ حادثہ علاقے کے ایک گاؤں ریڑھی بوڈکی کے پاس پیش آیا۔
جعمرات کو پولیس نے تمام 9 لاشیں نالے سے برآمد کرلیں اور خبر لکھے جانے تک چار لاشوں کی کی شناخت ہوچکی تھی۔ ایک درجن سے زیادہ افراد لاپتہ بتائے جا رہے ہیں جن کی تلاش کی جا رہی ہے۔
ادھر ریاست اترپردیش کے وزیر اعلی یوگی آدیتیہ ناتھ نے اس حادثے پر اہنے افسوس کا اظہار کیا ہے اور سہارنپور انتظامیہ سے کہا ہے کہ وہ فوری طور پر مرنے والوں کے خاندانوں کو 4-4 لاکھ روپے کی امداد فراہم کرے۔
