ہندوستانی کرکٹ ٹیم نے آئی سی سی چیمپئنز ٹرافی 2025 کا ٹائٹل جیت لیا
ہندوستانی کرکٹ ٹیم نے آئی سی سی چیمپئنز ٹرافی 2025 کا ٹائٹل جیت لیا، ہندوستان نیوزی لینڈ کو 4 وکٹوں سے با آسانی شکست دے کر تیسری مرتبہ چیمپئنز ٹرافی کا فاتح بن گیا۔
سحرنیوز/ہندوستان: دبئی انٹرنیشنل کرکٹ اسٹیڈیم میں آئی سی سی چیمپئنز ٹرافی کے فائنل مقابلے میں نیوزی لینڈ نے ہندوستان کو جیت کیلئے 252 رنز کا ہدف دیا، جسے ہندوستان نے 49 اوور میں 6 وکٹوں کے نقصان پر حاصل کرلیا۔
نیوزی لینڈ کی جانب سے دیے گئے 252 رنز کے ہدف کے تعاقب میں ہندوستانی ٹیم نے شاندار آغاز کیا اور پہلی وکٹ کی شراکت میں 105 رنز بنائے، نائب کپتان شبمن گل 31 رنز پر فلپس کے ہاتھوں کیچ آؤٹ ہوئے ، ہندوستانی ٹیم ابھی شبمن گل کی وکٹ کے نقصان سے سنبھل بھی نہ پائی تھی کہ مائیکل بریسویل نے محض چار گیندوں بعد ویرات کوہلی کو ایل بی ڈبلیو کر دیا۔ کوہلی صرف 1 رن بنا کر پویلین لوٹ گئے تھے، جس سے ہندوستان پر دباؤ مزید بڑھ گیا تھا۔
اس کے بعد راچن رویندرا نے ہندوستانی کپتان روہت شرما کی شاندار اننگز کا خاتمہ کیا۔ جو 76 رنز بنا چکے تھے اور ایک بڑے شاٹ کھیلنے کے چکر میں آگے بڑھے، لیکن گیند ان کے بلے سے چوک گئی اور وکٹ کیپر ٹام لیتھم نے انہیں اسٹمپ کیا۔
اس سے قبل میچ میں ٹاس جیتنے کے بعد نیوزی لینڈ نے پہلے بیٹنگ کا فیصلہ کیا اور دھواں دار آغاز کے باوجود مقررہ 50 اوورز میں 7 وکٹوں پر 251 رنز بنائے۔ کیوی بیٹرز کو ہندوستانی اسپنرز نے جال میں پھنسا لیا، اور کسی کھلاڑی کو کھل کر کھیلنے یکا موقع نہ دیا۔ نیوزی لینڈ کے اوپنرز نے ٹیم کو اچھا آغاز فراہم کیا اور 7.4 اوورز میں اسکور 57 رنز تک پہنچایا جس کے بعد ہندوستان اوپنر وِل ینگ کی وکٹ لینے میں کامیاب ہوگیا، وہ 15 رنز بنا کر آؤٹ ہوئے۔
کچھ ہی دیر بعد 10.1 اوور میں ہندوستان نے دوسری وکٹ 69 رنز پر حاصل کرلی، راچن رویندرا 37 رنز بنا کر کلدیپ یادیو کی گیند پر آؤٹ ہوئے۔ نیوزی لینڈ کی تیسری وکٹ 12.2 اوورز میں 75 رنز پر گری، کین ولیمسن 11 رنز بنا کر کلدیپ یادیو کی گیند پر آؤٹ ہوئے۔ کیویز کو چوتھا نقصان ٹام لیتھم کی صورت میں 24ویں اوور میں اٹھانا پڑا، لیتھم 14 رنز بنا کر 108 کے مجموعے پر جڈیجا کی گیند پر ایل بی ڈبلیو آؤٹ ہوئے۔
نیوزی لینڈ ٹیم جب مشکلات کا شکار ہوئی تو ڈیرل مچل نے گلین فلپس کے ہمراہ اسکور کو آگے بڑھایا، 165 کے مجموعے پر فلپس ورون چکرورتھی کی گیند پر 34 رنز بنا کر بولڈ ہوگئے۔ ڈیرل مچل نے محتاط انداز میں اسکور بنانے کا سلسلہ جاری رکھا، وہ 63 رنز کی اننگز کھیل کر محمد شامی کی گیند پر کیچ آؤٹ ہوئے۔ اننگز کے اختتامی لمحات میں مائیکل بریسویل نے 40 گیندوں پر 53 رنز کی باری کھیل کر اپنی ٹیم کو 251 کے ہندسے تک پہنچایا۔ ہندوستان کی جانب سے ورون چکرورتھی اور کلدیپ یادیو نے دو دو جبکہ محمد شامی اور رویندرا جاڈیجا نے ایک ایک وکٹ لی۔
اس سے قبل دبئی انٹرنیشنل کرکٹ اسٹیڈیم میں ٹاس کے بعد گفتگو کرتے ہوئے نیوزی لینڈ کے کپتان مچل سینٹنر نے کہا کہ میٹ ہنری انجری کے باعث نہیں کھیل رہے، ان کی جگہ نیتھن اسمتھ آئے ہیں۔ مچل سینٹنر نے کہا کہ توقعات کے مطابق ہندوستانی شائقین کی بڑی تعداد موجود ہے، وکٹ اچھی لگ رہی ہے، پِچ ویسی ہی ہے جیسے ہندوستان کے خلاف پچھلے میچ کی تھی۔ بعد ازاں ہندوستانی ٹیم کے کپتان روہت شرما نے کہا کہ نیوزی لینڈ کی ٹیم بہت اچھی ہے، پِچ اچھی ہے، دوسری بیٹنگ سے فرق نہیں پڑتا۔
روہت شرما نے کہا کہ ڈریسنگ روم میں یہی بات کی تھی کہ ٹاس کی فکر نہ کریں اور صرف اچھا کھیلنا ہے، نیوزی لینڈ گزشتہ کئی سالوں سے بہت اچھی ٹیم رہی ہے۔ انہوں نے کہا کہ نیوزی لینڈ آئی سی سی ٹورنامنٹس میں اچھی کرکٹ کھیلتی ہے، ہمارے لیے چیلنج نیوزی لینڈ کے خلاف اچھا کھیلنا ہے، ٹیم میں کوئی تبدیلی نہیں کی ہے۔ خیال رہے کہ یہ ہندوستان کا پانچواں جبکہ نیوزی لینڈ کا تیسرا چیمپئنز ٹرافی کا فائنل تھا۔
