بہار میں نئي ووٹرلسٹ ہوئی جاری، 47 لاکھ ووٹروں کے نام غائب! کیا زیادہ تر مسلمان ووٹروں کے نام ہٹائے گئے ہیں؟
بہار میں یہ پہلا موقع تھا کہ ووٹر لسٹ کو اسپیشل انٹینسیو ریویژن یعنی ایس آئی آرکے ذریعہ جامع طور پر اپ ڈیٹ کیا گیا۔ لیکن اس بار بھی 65 لاکھ کے بجائے 47 لاکھ ووٹرس کے نام فہرست سے ہٹا دئے گئے ہیں۔
سحرنیوز/ہندوستان: بہار اسمبلی انتخابات کی تیاریاں تیزی سے آگے بڑھ رہی ہیں ۔ بہار میں حتمی ووٹر لسٹ جاری ہوگئی ہے۔نئی ووٹر لسٹ کے مطابق بہار میں کل 74.2 ملین ووٹر ہیں یعنی سات کروڑ 42 لاکھ کل ووٹر ہیں۔ پچھلے سال کی فہرست کے مطابق، یعنی یکم جون 2025، یہ تعداد 78.9 ملین تھی۔ اس کا مطلب یہ ہے کہ 1 اگست 2025 کو جاری ہونے والی ڈرافٹ ووٹر لسٹ کے مقابلے کل 4.7 ملین ووٹرز یعنی 47 لاکھ ووٹرس کو فہرست سے ہٹا دیا گیا ہے۔
الیکشن کمیشن کی جانب سے جاری کردہ اعداد و شمار کے مطابق ڈرافٹ ووٹر لسٹ کے مقابلے نااہلی کی وجہ سے حتمی ووٹرلسٹ سے 366,000 نام نکالے گئے، جب کہ 21.53 لاکھ نئے ووٹرز جو ڈرافٹ رول میں شامل نہیں تھے، نے فارم 6 بھر کر اپنے نام شامل کیے ہیں۔
الیکشن کمیشن کے مطابق اگر کوئی اہل شخص اب بھی اپنا نام ووٹر لسٹ میں شامل کرنا چاہتا ہے تو وہ فارم 6 بھر کرکے درخواست دے سکتا ہے، بشرطیکہ الیکشن کے لیے کاغذات نامزدگی جمع کرانے کی آخری تاریخ سے دس دن پہلے درخواست جمع کرائی گئی ہو۔ اگر کوئی شخص حتمی ووٹر لسٹ میں اپنے نام کے بارے میں ERO کے فیصلے سے مطمئن نہیں ہے، تو وہ عوامی نمائندگی ایکٹ 1950 کے سیکشن 24 کے تحت ضلع مجسٹریٹ کے سامنے پہلی اور سی ای او کے سامنے دوسری اپیل دائر کر سکتا ہے۔
اس دوران ہندوستان کے کئی میڈیا ذرائع نے یہ خبر دی ہے کہ 1 اگست 2025 کو جاری ہونے والی ڈرافٹ ووٹر لسٹ کے مقابلے نئی جاری کی گئی لسٹ میں 4.7 ملین ووٹرز یعنی 47 لاکھ ووٹرس کو فہرست سے ہٹا دیا گیا ہے۔ ووٹرس لسٹ سے ہٹائے گئے زیادہ تر ناموں کا تعلق مسلمان ووٹروں سے ہے۔ بہرحال اس بارے میں ابھی یقینی طور پر نہیں کہا جا سکتا، جب تک کوئی موثق رپورٹ سامنے نہیں آجاتی ہے۔
