ہندوستان کا دستور مساوات، انصاف اور عزت کا وعدہ ہے: اپوزیشن لیڈر راہل گاندھی
راہل گاندھی نے یومِ آئین پر کہا کہ ہندوستان کا دستور مساوات، انصاف اور عزت کا وعدہ ہے، جس پر کسی حملے کی اجازت نہیں دی جائے گی۔ انہوں نے آئین کی حفاظت کو ہر شہری کا فرض قرار دیا ہے۔
سحرنیوز/ہندوستان: یومِ آئین کے موقع پر لوک سبھا میں قائد حزب اختلاف اور کانگریس کے سینئر رہنما راہل گاندھی نے ایکس پر جاری اپنے پیغام میں کہا کہ ہندوستان کا دستور صرف ایک قانونی دستاویز نہیں بلکہ ملک کے ہر شہری سے کیا گیا ایک مقدس وعدہ ہے۔ ان کے مطابق یہ وعدہ مذہب، ذات، زبان، خطے یا معاشی حیثیت سے بالاتر ہو کر مساوات، احترام اور انصاف کی ضمانت فراہم کرتا ہے۔ انہوں نے کہا کہ کسی شہری کو اس بنیاد پر کم تر نہیں سمجھا جا سکتا کہ وہ کون ہے اور کہاں سے آتا ہے، کیونکہ آئین اس کا محافظ ہے۔
راہل گاندھی نے اپنے بیان میں لکھا کہ آئین کمزور طبقات، غریبوں، محروموں اور پسماندہ طبقات کے لیے ایک حفاظتی ڈھال کی حیثیت رکھتا ہے، جو انہیں آواز، طاقت اور حقوق دیتا ہے۔ ان کے مطابق جب تک آئین محفوظ ہے، ہندوستانی شہریوں کے حقوق بھی محفوظ رہیں گے اور جمہوری ڈھانچہ مستحکم رہے گا۔ انہوں نے شہریوں سے اپیل کی کہ وہ آئین کی روح، اصولوں اور اقدار کی حفاظت کے لیے متحد رہیں۔
ہمیں فالو کریں:
Follow us: Facebook, X, instagram, tiktok
راہل گاندھی نے کہا کہ ’’ہمیں یہ عہد کرنا چاہیے کہ آئین پر کسی بھی طرح کا حملہ برداشت نہیں کریں گے۔‘‘ انہوں نے یہ بھی دعویٰ کیا کہ اگر آئین کو ٹھوس انداز میں بچانے کی ضرورت پیش آئی تو وہ سب سے آگے کھڑے ہوں گے۔ آخر میں انہوں نے تمام ہندوستانیوں کو یومِ آئین کی مبارکباد دیتے ہوئے ’جے ہند، جے آئین‘ کے نعرے کے ساتھ اپنا پیغام مکمل کیا۔
