ہندوستان: بی جے پی لیڈر نتن گڈکری نے پھر اپنی ہی پارٹی کو ہدف تنقید بنایا کہا، "وزیروں کی بیویوں کو ٹکٹ دیئے جا رہے ہیں۔"
ہندوستان کے مرکزی وزیر اور بی جے پی کے سینيئر لیڈر نتن گذکری نے ایک بار پھر اپنی ہی پارٹی کو ہدف تنقید بناتے ہوئے کہا ہے کہ "20-30 سال سے محنت کرنے والے کارکنان کو نظر انداز کرکے وزیروں کی بیویوں کو ٹکٹ دیئے جا رہے ہیں۔"
سحرنیوز/ہندوستان: ہندوستانی میڈیا رپورٹوں کے مطابق نتن گڈکری نے ایک بار پھر اپنی پارٹی بی جے پی کے خلاف محاذ کھول دیا ہے۔ انہوں نے بی جے پی پر اقرباپروری کا الزام لگاتے ہوئے کہا ہے کہ ’’20-30 سال سے پارٹی کے لئے محنت کرنے والا کارکن جب الیکشن کے وقت ٹکٹ مانگنے جاتا ہے تو اسے نظر انداز کرکے کسی وزیر کی بیوی کو ٹکٹ دے دیا جاتا ہے۔‘‘
اطلاعات کے مطابق نتن گڈکری نے کہا کہ ’’حیرانی کی بات یہ ہے کہ عوام انہیں ووٹ بھی دیتے ہیں۔ عوام کو چاہئے کہ ایسے امیدواروں کو ووٹ نہ دیں تاکہ انہیں سبق ملے۔‘‘ انہوں نے ایک ٹی وی چینل کو دیئے گئے انٹرویو کے دوران یہ باتیں کہیں۔
قابل ذکر ہے کہ نتن گڈکری نے گزشتہ 2-3 ماہ میں تیسری مرتبہ اس طرح کُھل کر اپنی پارٹی پر تنقید کی ہے۔
انٹرویو کے دوران ان سے پارٹی پر اقربا پروری کا الزام لگانے کے تعلق سے سوال کیا گیا تو انہوں نے کہا کہ ’’مجھے بہت بُرا لگتا ہے جب 20-30 سال تک پارٹی کے لئے کام کرنے والا کارکن ٹکٹ مانگنے آتا ہے، اسی وقت کوئی وزیر کہہ دیتا ہے کہ میری بیوی کو یا میری بیٹی کو ٹکٹ دیجئے، اس بے چارے کاٹکٹ چلا جاتا ہے۔ یہ بہت افسوس ناک بات ہے لیکن اس کے لئے عوام ذمہ دار ہیں۔‘‘
ہمیں فالو کریں:
Follow us: Facebook, X, instagram, tiktok
انہوں نے کہا کہ ’’کسی بھی پارٹی کے وراثت دار امیدوار کےکھڑے ہونے پرعوام انہیں شکست دے دیں تو پارٹیاں انہیں کھڑا ہی نہیں کریں گی۔ عوام کو اس پر رد عمل ظاہر کرنا چاہئے لیکن عوام ہی انہیں منتخب کرتے ہیں جس کی وجہ سے وہ قبول کئے جاتے ہیں۔‘‘
